Komisioni i Sigurisë Kombëtare ka thelluar hetimet për presidentit Ilir Meta sa i takon skandalit me nënshtetësitë. Edhe pse duket se kjo se kjo çështje ka humbur dhe nuk është më në vëmendjen e publikut, gazeta ka mësuar se Komisioni i Sigurisë po punon fort në prapaskenë për të “gozhduar” presidentin Meta.
Fillimisht ky komisioni zhvilloi një mbledhje dëgjimore me gazetarin që denoncoi skandalin me shtetësitë, të cilit në përfundim i administroi si prova edhe faktet që ai dispononte, ndërsa më pas u kërkua informacion nga Presidenca, Ministria e Brendshme dhe Shërbimi Informativ Shtetëror.
Por mësohet se plani për të hetuar Metën është forcuar rrugës, pasi një anëtar i Komisionit të Sigurisë i pohoi gazetës se komisioni është i vendosur për të hetuar me detaje veprimtarin e kreut të shtetit për shtetësitë, ndërsa zbuloi se u janë dërguar shkresa për të marrë informacione plot 14 institucioneve. Sipas tij, arsyeja kryesore pse është shtrirë hetimi në kaq shumë institucione është se skandali me shtetësitë është një çështje me ndjeshmëri të lartë.
“Komisioni i Sigurisë Kombëtare është i vendosur për të hetuar skandalin e bërë publik në media mbi shtetësitë, ku është i përfshirë Presidenti i Republikës, Ilir Meta. Ne si komision në seancën e pak ditëve më parë administruam dokumentet e gazetarit që denoncoj skandalin me nënshtetësitë, ndërkohë kërkuam informacione edhe nga institucionet.
Por nisur nga ndjeshmëria e skandalit dua t’ju bëj me dije se në kuadër të hetimit iu jemi drejtuar me shkresa, duke kërkuar informacion nga 11 ministri, SHISH, Policia e Shtetit, Prokuroria e Përgjithshme”, deklaroi një anëtar i Komisionit të Sigurisë Kombëtare për gazetën “SOT”.
Ja strategjia për të futur në lojë SPAK
Por nuk ndalet me kaq pasi Komisioni i Sigurisë kjo vetëm që është i vendosur për të çuar deri në fund hetimin me skandalin me shtetësitë, por ka në plan që të fusë në lojë edhe Strukturën e Posaçme Kundër Krimit të Organizuar dhe Korrupsionit, në rast se do të gjendet shkelje për presidentin Ilir Meta.
I njëjti anëtar i Komisionit të Sigurisë i tha gazetës se do të kërkohen informacione nga 11 ministri se kush janë personat që këto të fundit kanë kërkuar që të pajisen me shtetësi shqiptare. Kështu që nëse gjatë krahasimeve që do të bëhen pasi të administrohet dokumentacioni voluminoz i ministrive me ato shtetësisë që ka dhënë kreu i shtetit, do të dalin se shumicën e shtetësive e ka dhënë Meta, për individë që nuk janë biznesmenë apo personalitete të dobishme për vendin, por janë njerëz të dënuar, do të hyjë në lojë SPAK për hetime më të thella. Kjo pasi i bie që Meta i ka dhënë shtetësitë sipas dëshirës së tij.
“Objekti i kërkesës që tashmë iu ka shkuar institucioneve të sipërpërmendur, ka të bëjë me informacion sipas ligjit të shtetësisë, se kujt i kanë konfirmuar dhënien e shtetësisë këto institucione. Ndërkohë pasi të bëjnë konfirmimet institucionet në fjalë, shtetësitë që do ngelen pa u konfirmuar i bie që i ka bërë dhe dhënë Presidenti i Republikës me mendjen e tij.
Më pas informacionet do të gjykohen me detaje dhe nëse do të dal se presidenti Meta iu ka dhënë shtetësi personave që nuk janë personalitet, të dobishëm për vendi, apo që kanë investuar, etj, nuk përjashtohet mundësia që të kallëzojmë penalisht Presidentin e Republikës në SPAK. Kjo pasi edhe deputetët e opozitës e kërkojnë këtë gjë”, deklaroi dje një anëtar i Komisionit të Sigurisë Kombëtare për gazetën “SOT”.
