Çdo ditë që kalon dhe afrohemi drejt zgjedhjeve të 25 prillit, aq më shumë po tensionohet klima politike në vend. Protestat e ditëve të fundit rikthyen edhe një herë sherret e forta, ndërsa ajo që bie në sy është se kemi një gjuhë tepër të fortë nga ana e presidentit dhe e ish-kryeministrit Sali Berisha, për të mos thënë se janë në të njëjtën linjë.
Meta ditën e mërkurë i dërgoi një mesazh të fortë kryeministrit, duke paralajmëruar se do të mbajë një tubim për rrëzimin e qeverisë. “Në këtë drejtim të jeni të sigurt që nëse do të ketë një manifestim tjetër nga presidenti, do të ketë dhe një, por vetëm një dhe do të jetë publik dhe do të jetë manifestimi i fundit kundër dhunës për t’i dhënë fund një regjimi të dhunshëm ndaj të drejtave të shqiptarëve”, tha Meta dje.
Por akoma dhe më i ashpër ishte ish-kryeministri Berisha, i cili pas propozimit për të bërë Bledi Çuçin ministër kërkoi që qytetarët të ngrihen për rrëzimin e qeverisë. “Ky emërim unik në historinë e Shqipërisë është një kushtrim për çdo shqiptar të ngrihet kundër këtij regjimi të kalbur nepotik që nuk njeh ligj, normë as etikë shteti, për ta përmbysur sa më parë dhe me çdo kusht Edvin Kristaq Xhelatin dhe narkoshtetin e tij”, tha ai.
Por deklaratat e tyre vijnë në një kohë kur jemi 4 muaj para zgjedhjeve. Nuk është aspak normale të ngrihesh dhe të rrëzosh një qeveri para zgjedhjeve, pasi shumë mirë përmes votës mund të vish në qeveri dhe ajo do të jetë tërësisht legjitime. Atëherë pse ka kërcënime me dhunë, me destabilizim dhe me kaos?
Prapaskenat
Sipas informacioneve të gazetës, dy janë elementët që fshihen pas mesazheve të Metës e Berishës. E para, dyshohet se palët po kërkojnë pazare. Ndryshe nga gjithë këto vite, më 25 prill askush nuk e ka të sigurt fitoren. Për këtë arsye presidenti duket se kërkon pazare. Elementi dytë është se politika është trembur nga SPAK.
Kërcënimet vijnë në një kohë kur kemi pasur shumë zhvillime të forta ditët e fundit në Prokurorinë e Posaçme. Dërgimi për gjykim i Adriatik Llallës ka alarmuar si Metën dhe Berishën, pasi Llalla ishte ushtar i tyre. Dënimi tij do të ishte një mesazh edhe për ata që fshihen pas tij. Emër tjetër është ish-kryebashkiakja e Gjirokastrës, Zamira Rami. Edhe ajo u dërgua në gjykatë për abuzime.
Por goditja më e madhe ishte zbardhja e vrasjes së Vajdin Lamajt 15 vite më parë. Ky ishte një sinjal se SPAK po hap dosjet e vjetra. Ka shumë vrasje, si ajo e Artan Santos, ku thuhet se shumë shpejt do të zbardhen dhe dyshimet janë se ka politikanë të përfshirë. Kemi vrasjen e Skerdilajt Konomit, që po ashtu dyshohet se ka gisht politika. Ka dhe shumë dosje të mëdha korrupsioni që mund të hapen. Pra të gjitha këto duket se kanë trembur klasën politike.
LSI sulmon SPAK
Ajo që e vërteton se Meta e Berisha janë shqetësuar nga SPAK janë dhe sjelljet e LSI. Kohët e fundit SPAK është kthyer në një tabelë qitje nga partia e presidentit. Kështu ka ndodhur dhe dje, ku Petrit Vasili ka sulmuar SPAK sa i takon numrit të vdekjeve nga Covid-19.
“SPAK i njohur për frikën e madhe për të hetuar qeverinë nuk po e mund dot frikën dhe kapjen që të hetojë këta tregues kritikë me rritje të vdekjeve 103%, që flasin vetë. SPAK po bëhet bashkëfajtor i një situate shumë të rëndë, që lidhet me humbjen e jetës së shqiptarëve. SPAK zgjohu dhe vepro, sepse asnjë lëvdatë artificiale në shqip apo anglisht nuk të mjafton si alibi përpara fshehjes së vdekjeve të shqiptarëve”, tha Vasili. /Kliti Topalli
