Nga Anri Bala
Erion Braçe, njihet nga të gjithë shqiptarët si zv. Kryeministër i Shqipërisë. Ama vetëm nga shqiptarët, sepse vetë ai, as nuk e di, as nuk e ka parë dhe as nuk e ka dëgjuar Edi Ramën, kur në prezantimin e qeverisë, emri i dytë pas tij, është emri i Erion Braçes.
Kështu mendoj se duhet të jetë e shkruar edhe në shumë dokumente dhe urdhëresa që nxjerr qeveria, që në mungesë të kryeministrit, firmosen e vulosen nga zëvendësi i tij i parë dhe i vetëm.
Mirëpo çudia është se, qytetarët dhe bashkë me ta dhe unë, kemi filluar të dyshojmë që deputeti i katër legjislaturave, duhet të ketë problem të shëndetit mendor, përderisa vetëm ai nuk e di, se përse është atashuar prej vitesh në kryeministri dhe nuk arrin të lexoi, mbi derën e zyrës… Zv. Kryeministri!
Ndaj, me thënë të drejtën, na ka vënë në siklet, sepse ose duhet t’i themi Ramës se ke një post bosh nën vete, ose duhet t’i mbushim mendjen Erionit, se është zëvendësi i Ramës megjithëse fizikisht, hynë dy herë tek Rama. Ndoshta, kjo mund të jetë dhe një nga arsyet, që Braçe nuk e beson, se është ai zëvendësi.
Nëse vërtetë është i bindur se ai përfaqëson popullin dhe kërkon që populli ta mbroj nga shteti, po populli nga kush do të kërkoi mbrojtje?! Kjo është enigmë e madhe që mund ta zgjidh vetëm Erioni, duke pyetur Ramën dhe jo Braçen, që nuk resht duke u tallur dhe trembur shqiptarët.
Mënyra figurative që përdor deputeti Erion, është paksa e rëndë për tu honepsur nga qytetarët, që e kanë stomakun plot me bëma dhe histori të përdorimit të fuqisë së parasë. Të thuash se shteti, që t’i drejton ka degraduar, është thirrje për revolucion me parullën: “Hajde ta çlirojmë Shqipërinë nga këto oligarkë, nga kjo administratë, nga ky pushtet, nga kjo polici, nga… Edi Rama.
Jam i sigurt që kur i hedh këto mesazhe në profilin e tij, Erioni është përgjumësh dhe ngatërron adresë. Ato në fakt janë “shigjeta” për Edi Ramën, por Erioni i hedh në eter, duke menduar se edhe Rama do i lexoi ndonjë ditë, ndërsa qytetarët i bënë për të vjell, kur hiqet sikur po troket në dritare, që të hapet dera.
Ne duhet të gjejmë një menyrë për ta bindur Braçen, se është qeveritari numër 2 në Shqipëri, që ta heqi fiksimin, se është kokër misër që e ha gjeli! Problemi është, se si do i përgjigjemi pyetjes së tij: Po gjelin kush do ta bindi, se unë nuk jam kokërr misri?!
Halli i madh edhe për ne, që një zv. Kryeministër, na kërkon t’i zgjidhim hallin dhe ne nuk e ndihmojmë dot njësoj, si ata që e kanë tallur! /Ekskluzive.al
