Nga Anri Bala
Deliri që ka kapur qeverinë shqiptare me situatën e mirë antikovid, nuk e prisnim që të vazhdonte që në fillimet e mandatit të tretë. Turizmi një dhuratë e natyrës, që sjell të ardhura kolosale për një vend të vogël si Shqipëria, pothuajse është i izoluar totalisht. Lejimet e ardhjes së turistëve me teorinë e kufijve të hapur është një bllof i Edi Ramës, për të mos thënë një gënjeshtër e madhe.
Vërtet lejohen të vijnë qytetarë nga gjithë bota pa test dhe pa asnjë kufizim, por ata nuk vijnë për tu ngujuar, sepse nuk paguan askush mijëra dollar për të ardhur në Shqipëri me liri të kufizuar, që në shqip përkthehet ngujim pas orës 23 të mbrëmjes. Qytetarët europin dhe shqiptarë nuk paguajnë për djathin dhe gjizën shqiptare, as për të parë se si po i rindërton banesat e shembura nga termeti Edi Rama, por ato pak ditë pushim që ua jep ligji t’i shfrytëzojnë për tu relaksur dhe argëtuar me familjarët dhe miqtë.
Mbyllja e lokaleve dhe e muzikës dhe orari pandemik, janë një tallje me turistët. Vaksinimi i gjithë punonjësve të sektorit të turizmit është një mashtrim tjetër, sepse është e pamundur të fillohet jo më të realizohet, kur shumica e të punësuarve janë sezonal.
Kurse strategjia e masave shtrënguese nuk ka asnjë efekt, sepse covid përpos masave të marra është drejt largimit dhe një nga provat është Kosova, që e fundit në Europë për masat e marra gjendja e të infektuarve dhe e humbjes së jetëve është e barabartë me Shqipërinë, që është e para në Europë për shkallën e vaksinimit për frymë.
Ndaj mos u tallni me turistët dhe ata që paguajnë! Shqipëria duhet të jetë zonë e lirë me gjithçka të hapur, sepse turistë nuk janë punëtor sezonal. Mjaft bëtë lojra në dëm të ekonomisë dhe biznesit duke i lënë të përpëliten me pallavrat se jemi në kohë pandemie. Pandemia iku, ju nuk ikët, por meqë qëndruat, kthehuni me këmbë në tokë se mjaft ndenjët në ajër…/Ekskluzive.al
