Pazaret me Gjykatën Kushtetuese kanë alarmuar Shtetet e Bashkuara të Amerikës. Edhe pse kërkohet me ngulm ngritja e Kushtetueses brenda muajit dhjetor, duket se amerikanët nuk i kanë pëlqyer lëvizjet e Këshillit të Emërimeve në Drejtësi dhe politikës.
Tre kandidatë do t’i dërgohen Presidencës dhe Kuvendit për të zgjedhur, por disa nga emrat nuk pëlqehen nga politika. Por kjo gjë është “nuhatur” nga ambasadorja e SHBA në Tiranë, Yuri Kim, e cila i ka dërguar ditën e djeshme një ultimatum politikës që të lërë pazaret me Gjykatën Kushtetuese. Përmes një statusi në rrjetet sociale, ambasadorja Kim i ka bërë dje thirrje kreut të KED, Vitore Tushës të mos mbajë të bllokuar kandidatët finalë që do t’i shkojnë Metës dhe Ruçit, ndërsa ka theksuar se s’ka arsye që Kushtetuesja të mos jetë gati brenda 31 dhjetorit.
“Këshilli i Emërimeve në Drejtësi duhet të takohet këtë javë për të përfunduar vlerësimin dhe për të dërguar listën e kandidatëve në Presidencë dhe Parlament. Proceset duhet të respektohen, por jo të keqpërdoren. Nuk ka asnjë arsye praktike që Gjykata Kushtetuese të mos jetë funksionale deri më 31 dhjetor.
Është çështje vullneti. Udhëheqësit duhet të tregojnë vullnetin e tyre të vërtetë”, ka shkruar ambasadorja Kim. Pra, duket qartë që Shtetet e Bashkuara të Amerikës jo vetëm që kërkojnë ngritjen sa më parë të Gjykatës Kushtetuese, por apelojnë për një proces transparent, ku politika të mos ketë ndikim në përzgjedhjen e anëtarëve të rinj të këtij institucioni kaq të rëndësishëm.
Mesazhet e Kim
Po dje ambasadorja amerikane, Yuri Kim ka komentuar edhe 3 prioritetet e saj kryesore në Shqipëri, të cilat sipas saj, janë demokracia, mbrojtja dhe investimet e huaja. Gjatë një interviste për “Marshall Center Voices”, ambasadorja Kim theksoi se Shqipëria nuk ka pse të jetë e varfër pasi ka një popullatë të re dhe me aftësi të cilat i ka demonstruar, gjithashtu gëzon pasuri dhe mundësi të jashtëzakonshme që mund të zhvillohen në turizëm në infrastrukturë. Sipas Kim, problemi qëndron tek ligji dhe gjykatat.
“Sepse unë mendoj se tek këto duhet të ketë më shumë nxitje dhe më shumë nevojë. I vendos të gjitha sepse janë të lidhura. Le të fillojmë nga demokracia, mbrojtja dhe biznesi. S’ka arsye pse Shqipëria të jetë e varfër. Një popullsi e re, ka demonstruar që ka aftësi. Kush ka ardhur në Shqipëri i ka dalë një eksperiencë pozitive. Ka mundësi të jashtëzakonshme që mund të zhvillohen në turizëm në infrastrukturë.
Biznesi që është mundësi e mirë për një vend thonë ambasadorët amerikan për qytetarët e huaj që vijnë sepse tregojnë që mund të përfitojnë. Mënyra si e bëjnë ata duan të dinë se çfarë ka këtu, sa i kushton. Duan një mekanizëm të drejtë e transparent të qëndrueshëm që lejon për zgjidhje. Për fat të keq kjo mungon. Dhe prandaj ne shtyjmë fort tek demokracia, për të theksuar rëndësinë e “Rule-of-law”.
Dhe e rëndësishmja për Gjykata të pastra. Puna ime si ambasadore është që të punoj me shqiptarët dhe t’i siguroj se është një ambient ku amerikanët biznesmenë, punëtorë, konsumatorë po aq sa shqiptarët mund të përfitojnë, për ta bërë më shumë vende pune. Të kemi rregulla dhe gjykata të pastra”, deklaroi ambasadorja Kim.
Soreca: Kushtetuesja, kusht për integrimin
Por edhe ambasadori i Bashkimit Europian në Tiranë, Luigi Soreca i është bashkuar mesazhit të ambasadores së SHBA në Shqipëri, Yuri Kim, pasi ka shpërndarë postimin e saj në “Twitter”, duke nënvizuar rëndësinë e plotësimit të Gjykatës Kushtetuese për integrimin.
“Është me të vërtetë kritike që KED të përfundojë vlerësimin e shpejtë të kandidatëve për vendet e lira në Gjykatën Kushtetuese, duke u bazuar në opinionet e Komisionit të Venecias.
Funksionaliteti i plotë i Gjykatës Kushtetuese është një kusht kryesor për të filluar bisedimet e pranimit në Konferencën e Parë Ndërqeveritare”, ka shkruar Soreca. Kujtojmë se KED ka kualifikuar tre kandidatë që plotësojnë kriteret, Sonila Bejtja, Altin Binaj dhe Aleksandër Toma.
