Partia Socialiste ka vendosur të marrë më shumë kohë për ligjin e presidentit. Në fillim të shtatorit Komisioni për Çështjet Ligjore,
Administratën Publike dhe të Drejtat e Njeriut ngriti grupin e punës që do të merrej me hartimin e draftit dhe propozimin në Kuvendin e Republikës së Shqipërisë të projektligjit “Për Institucionin e Presidentit të Republikës së Shqipërisë”.
Ky grup pune përbëhet nga deputetët Vasilika Hysi dhe Adnor Shameti nga mazhoranca parlamentare, si dhe deputeti Alban Zeneli nga pakica parlamentare, ndërsa u caktua si afat për draftimin dhe propozimin e projektligjit data 15 tetor 2020. Por Kuvendi nuk do të mund të vendosë më 18 tetor për t’i kufizuar kompetencat presidentit Ilir Meta, pasi gazeta ka mësuar se Komisioni i Posaçëm që po merret me draftin ka kërkuar më shumë kohë për përgatitjen e ligjit organik për kreun e shtetit.
Sipas informacioneve, i është kërkuar ndihmë Ilir Rusmajlit dhe Viktor Gumit që do të japin ekspertizën e tyre mbi nenet që do të paraqiten për votim. Madje, mësohet se deputetët i kanë kërkuar Rusmajlit, Gumit dhe Mërkurit që të sjellin një draft deri në fund të muajit që më pas dokumenti të hyjë në procedurat parlamentare sa më shpejt.
Rama mesazh deputetëve
Por zvarritja dhe mos mbyllja e draftit për ligjin organik për Presidentin e Republikës nga grupi i punës, duket se ka “acaruar” kryeministrin Edi Rama. Gazeta “SOT” ka mësuar se zoti Rama iu ka dërguar një mesazh anëtarëve socialistë të grupit të punës dhe deputetëve të Partisë Socialiste të Komisionit të Ligjeve që të nxitojnë me projekligjin, pasi sipas tij, me sjelljet e fundit, presidenti Ilir Meta duhet të izolohet.
Në mesazhin që ka siguruar gazeta, i pari i qeverisë ka kërkuar nga të vetët që ta kopsitin mirë draftin, në mënyrë që të mos i lënë shteg Metës që të abuzojë, ndërsa iu ka sugjeruar edhe 4 fushat ku duhet të fokusohet ligji organik. Madje, sikundër citohet në mesazhin që iu ka shkuar ligjvënësve socialistë të “Ligjeve”, Rama është shprehur qartë dhe prerë se mazhoranca nuk i ka asnjë borxh Ilir Metës dhe boll e ka toleruar.
“Ligji për Presidentin duhet të jetë gati sa më shpejt, për t’i dhënë fund njëherë e mirë mundësisë së Ilir Metës që të mos bëj çudira. Shikon mundësinë që të mos i lejoni shteg kreut të shtetit që të abuzojë, duke mos dekretuar ministrat e kabinetit, raportet me institucionet, dekretet dhe dekoratat. Punoni dhe silleni sa më parë në Kuvend ligjin. Boll më me sjelljen e Metës që nuk e meriton të jetë aty ky është dhe ka turpëruar Shqipërinë, se veten e tij po e po”, thuhet ndër të tjera në mesazhin që kryeministri Edi Rama iu ka dërguar anëtarëve socialistë të grupit të punës dhe deputetëve të Partisë Socialiste të Komisionit të Ligjeve që disponon gazeta “SOT”.
Pra, përplasjet e ditëve të fundit mes Ramës dhe Metës, kanë bërë që mazhoranca të mos lëshojë pe, ku nga njëra anë ka paralajmëruar se do të rrëzojë dekretin e Metës për Kodin e ri Zgjedhor dhe nga ana tjetër po harton ligjin organik që pritet të izolojë Presidentin e Republikës, duke i kufizuar disa të drejta. Megjithatë, mbetet të shihet në ditët në vijim se çfarë do të ndodhë më konkretisht./Rigels Seliman
