Ilir Meta vijon të jetë protagonist, ku thuajse çdo ditë shpik nga një kauzë për të sulmuar qeverinë dhe për të qenë në qendër të vëmendjes.
Edhe pse duhet të qëndronte mbi palët, ashtu siç premtoi para 3 vitesh kur u betua President i Republikës, Meta prej muajsh është zhveshur nga kostumi i kreut të shtetit.
Ky i fundit ka marrë “de facto” drejtimin e kreut të opozitës, ndërsa përtej të bërit politikë, ai përpiqet të sulmojë mazhorancën qeverisëse sapo i jepet mundësia.
Gazeta ka bërë një përmbledhje të strategjisë së ndjekur nga Meta gjatë kohëve të fundit, ndërkohë që bie në sy fakti se çështjet për të cilat ai flet dhe komenton janë të ndryshme. Më konkretisht, presidenti Meta ka ngritur shqetësimin për çështje si rrënimi i ekonomisë, mungesa e drejtësisë, mungesa e investimeve në bujqësi, mungesa e subvencioneve në blegtori, shpopullimi i vendit dhe ikja e të rinjve, inceneratorët, koncesionet, deri tek të bërit atdhetar dhe patriot, për të cilat ka bërë fajtore qeverinë “Rama”.
Meta merr edhe rolin e Kryeprokurorit
Por ditën e djeshme presidenti Ilir Meta ka shfrytëzuar ka përdoru si kauzë prishjen e teatrit për të sulmuar qeverinë, duke i treguar asaj madje edhe vijat e kuqe. Përmes një statusi në rrjetet sociale, kreu i shtetit ka rikujtuar dje shembjen e Teatrit Kombëtar në Ditën Kombëtare të Trashëgimisë Kulturore, ndërsa thekson se ai ishte një akt taleban i bërë nga një pushtet që sjell dëme të pariparueshme.
Më tej Meta shprehet se institucionet shtetërore janë sulme të drejtpërdrejta ndaj identitetit tonë kombëtar, duke i garantuar shqiptarët se gjithçka është mbajtur shënim dhe askush nuk ka për t’i shpëtuar drejtësisë, referuar 17 majit 2020, ditë kur godina e Teatrit Kombëtar u shemb pas përplasjeve me artistët dhe aktivistët e shoqërisë civile.
“Akti taleban i shembjes së Teatrit Kombëtar, shkatërrimi i shumë vlerave unikale arkeologjike në Durrës dhe dëmtimi i disa monumenteve në mbarë vendin janë dëshmitë ulëritëse më të freskëta se si arroganca, korrupsioni dhe papërgjegjshmëria e një pushteti mund të sjellë dëme të pariparueshme për trashëgiminë tonë kombëtare e kulturore, pjesë e trashëgimisë europiane.
Të gjitha këto krime të rënda kushtetuese, ligjore dhe morale, të konsumuara veçanërisht në Tiranë dhe Durrës ku dëmet kanë qenë të jashtëzakonshme, do të jenë të paamnistueshme! Sepse këto akte barbarie, për më tepër të kryera nga institucionet shtetërore, janë sulme të drejtpërdrejta ndaj identitetit tonë kombëtar. Ndaj sot në Ditën Kombëtare të Trashëgimisë Kulturore i garantoj të gjithë shqiptarët se gjithçka është mbajtur shënim dhe askush nuk ka për t’i shpëtuar Drejtësisë”, shkruan ai.
Por përmes kësaj deklarate presidenti Ilir Meta ka treguar se ka marrë rolin e Kryeprokurorit, pasi rolin e kryeopozitarit e ka marrë me kohë. Kjo pasi edhe vetë kreu i PD, Lulzim Basha që është normale që t’i bëjë opononecë dhe opozitë qeverisë, nuk ka bërë kaq shumë deklarata të forta sa ato të artikuluara nga Meta.
Reagon Rama
Megjithatë një përgjigje presidentit Ilir Meta ia ka kthyer kryeministri Edi Rama. Ky i fundit doli dje në një konferencë për shtyp, ndërsa është rikthyer sërish tek çështja e shembjes së Teatrit Kombëtar, që shkaktoi edhe kundërshti të ashpra e përplasje mes artistëve dhe policisë.
Gjatë fjalës së tij, kreu i qeverisë shqiptare nuk kurseu kritikat për Metën dhe opozitën, ndërkohë që mes ironisë theksoi se vajtojnë ende për atë ngrehinë të teatrit. “Vajtojnë akoma për atë ngrehinë të Teatrit Kombëtar, duke e përdorur si argument për të sulmuar talebanët që janë në qeveri.
Deri dje nuk vunë dorë në asnjë monument kulture dhe nuk prekën asnjë metër katror pëlhurë për ta pastruar nga gjithë shtresa e pluhurit që kishte rënë mbi gjithë këtë thesar kudo. Nëse do marrim të shohim listën e ndërhyrjeve në këto 7 vite në monumente kulture, është e gjatë.
Ky program me BE që startojmë sot është xhevahiri më i çmuar i kurorës së punës që kemi bërë sot”, deklaroi kryeministri Edi Rama./Rigels Seliman
