Struktura e Posaçme Kundër Korrupsionit dhe Krimit të Organizuar është institucioni më i rëndësishëm për Shtetet e Bashkuara të Amerikës. Kjo strukturë është “qershia mbi tortë” e reformës në drejtësi, pasi në fokus janë zyrtarët e korruptuar dhe bosët e krimit. Ditën e djeshme numri i prokurorëve të SPAK shkoi në 13 pas betimit të Manjola Kajanës, ndërkohë që nuk ka munguar as reagimi i ambasadës amerikane në Tiranë.
Përmes një postimi në rrjetin sociale “Twitter” ambasadorja e SHBA në Shqipëri, Yuri Kim ka përshëndetur shtimin e kapaciteteve të Prokurorisë së Posaçme me prokurorë të rinj, ndërsa ka dërguar tjetër mesazh për pushtetarët e korruptuar në vend.
Sipas saj, reforma në drejtësi nuk ndalet dhe se me rritjen e numrit të prokurorëve të SPAK po ngushtohet laku për të korruptuarit. “Urime ZPP/SPAK për prokurorin e ri që iu shtua ekipit. Kapacitet më i madh do të thotë më pak mundësi për të fshehur të paskrupujt”, shkruan në rrjetet sociale ambasadorja e SHBA në Tiranë, Yuri Kim.
Reforma në drejtësi nuk ndalet
Po dje, ambasadorja mori pjesë në një takim të zhvilluar online nga Ministria e Drejtësisë, ku të pranishëm ishin edhe drejtoresha për Ballkanin Perëndimor dhe shefja e Operacionit Ndërkombëtar të Monitorimit (ONM), Genoveva Ruiz Calavera, ambasadori i BE-së, Luigi Soreca, ekipi i Komisionit Europian dhe përfaqësuesit e misioneve EURALIUS dhe OPDAT në Shqipëri.
Burime nga kjo mbledhje pohuan se ambasadorja Kim e ka ndalur theksin tek reforma në drejtësi, për të cilën ka theksuar se ajo nuk ndalet dhe nuk ka kthim pas. Në këtë kontekst, mësohet se zonja Kim është shprehur se SHBA do të mbështesë reformën në drejtësi, ndërsa ka inkurajuar SPAK dhe BKH që të çojnë përpara luftën kundër korrupsionin.
Po ashtu, sipas informacioneve në të njëjtën linjë me zonjë Kim, dje ka qenë edhe ambasadori i Bashkimit Europian në Tiranë, Luigji Soreca, i cili gjatë takimit të zhvilluar online ka dhënë garanci se Brukseli mbështet fuqishëm reformën në drejtësi dhe organet e reja të dala prej saj. Nga ana tjetër detaje rreth takimit të djeshëm me ndërkombëtarët ka dhënë edhe ministrja e Drejtësisë, Etilda Gjonaj në rrjetet sociale. “Pata kënaqësinë të zhvilloj një takim online me shefen e ONM, Genoveva Ruiz Calavera, ambasadoren e SHBA, Yuri Kim, ambasadorin e BE, Luigi Soreca, ekipin e Komisionit Europian dhe me përfaqësueset e misioneve EURALIUS dhe OPDAT në Shqipëri.
Në këtë takim të rëndësishëm ndamë me partnerët tanë të ngushtë konkluzionet e analizës së detajuar mbi arritjet dhe problematikat e zbatimit të reformës në drejtësi dhe një plan konkret veprimi për të ecur përpara me rezultatet e pritshme. Në kuadër të mbështetjes teknike dhe buxhetore të Komisionit Europian për zbatimin e reformës, diskutuam bashkërisht mbi mënyrën më të mirë për të rritur eficencën e saj.
Dua të shpreh mirënjohjen për mbështetjen e pandërprerë të Komisionin Europian dhe bashkëpunimin e çmuar me delegacionin e BE në Shqipëri dhe ambasadën e SHBA, në këtë moment kaq të rëndësishëm të historisë së drejtësisë shqiptare”, deklaroi Gjonaj.
