Nisma e shoqërisë civile për të shkuar drejt referendumit për ndryshimin e sistemit zgjedhor duket se po has vështirësi të mëdha. Politika nuk e do ndryshimin e sistemit dhe për disa organizata të shoqërisë civile mënyra më e mirë është që të vendosë populli me referendum.
Grupi i përfaqësuesve të shoqërisë civile kishin dërguar në KQZ një kërkesë për mbajtjen e referendumit, me pyetjen konkrete “A janë dakord apo jo shqiptarët që të ndryshojë sistemi zgjedhor?”. Ndërkohë në mbledhjen e ditës së djeshme Komisioni Qendror i Zgjedhjeve nuk e pranoi këtë kërkesë, pasi sipas tyre nuk kishte kuorumin e duhur të vendimmarrjes. Ndërkaq përmes një deklarate të bërë publike grupi nismëtar tregon se kjo është e treta herë që KQZ nuk merr asnjë vendim në lidhje më propozimin e bërë nga ta.
“Sot, në datë 2 Qershor ora 10:00 nga KQZ u shqyrtua kërkesa e një grup qytetarësh për të mundësuar një Referendum Kombëtar për ndryshimin e sistemit aktual zgjedhor. Është e treta e herë që ne paraqitemi përpara KQZ. Sërish sot KQZ nuk mori dot vendim pasi nuk kishte kuorumin e duhur të vendimmarrjes, duke nxjerrë në pah problemet e rënda që kanë kapur edhe këtë Institucion”, thuhet në deklaratë. Më tej ata shprehen se, pretendimet e nxjerra nga anëtarët e KQZ për mbarimin e afatit nuk janë aspak të vërteta, ndërsa të zhgënjyer paralajmërojnë se këmbëngulja e tyre për kryerjen e referendumit do të vazhdojë.
“Ky vendim pa vendim as nuk mund të ankimohet pasi edhe Kolegji Zgjedhor si dhe Gjykata Kushtetuese nuk funksionojnë. Pretendimi i një prej anëtarëve të KQZ se afatet e plotësimit të procedurave kanë mbaruar në 15 mars (përgjatë pandemisë) ishte jo i vërtetë dhe i motivuar politikisht si e gjithë qasja e pjesës më të madhe të anëtarëve që kanë mbetur në KQZ. Ne sërish do ushtrojmë të drejtën tonë referendare qoftë dhe për të mundësuar aprovimin e Ligjit për Referendumet, pikërisht për t’i kthyer shqiptarëve të drejtën më elementare atë të ushtrimit të sovranitetit kombëtar që ja u garanton Kushtetuta”, thuhet në deklaratë.
Reagon KQZ
Nga ana tjetër KQZ shpreh pikëpamjet e saj dhe arsyet e refuzimit të kërkesës për referendum. Menjëherë pas deklaratës së përfaqësuesve të nismës ka reaguar dje nënkryetari i KQZ-së, Denar Biba.
Gjatë një interviste televizive për një sqarim më të detajuar për çka ndodhi dje në mbledhjen e KQ, Biba u shpreh se kërkesa e shoqërisë civile është refuzuar pasi nuk është dhënë një alternative tjetër për një sistem zgjedhor. Sipas tij, kërkesa e dërguar nga shoqëria civile duhet të jetë më e detajuar për atë çka kërkon. “Kishte një kërkesë nga shoqëria civile për ndryshimin e sistemit zgjedhor. Palët vetëm propozuan ndryshimin e sistemit zgjedhor, por pa dhënë një alternativë.
Pyetja në këtë rast ishte nëse duhet të ndryshohet sistemi zgjedhor aktual. Procedurat kërkojnë që bashkë me pyetjen të jepet edhe alternativa. Do të ishte mirë të thuhej nëse sistemi aktual që të ndryshohet në sistemin x. Pra të jepet një alternativë”, deklaroi ai. Më tej Biba tregoi se ai si anëtar i KQZ është pro ndryshimit të sistemit zgjedhor, por të jetë i kuruar më në detaje, ndërsa theksoi këtu se pengesë po bëhen vetë anëtarët e nismës. Sakaq ai tregon se KQZ do të marrë menjëherë parasysh propozimin nëse paraqitet i riprojektuar.
“Unë vetë jam për ndryshimin e sistemit zgjedhor, në aspektin si një qytet. Por mund të mos jem për lista të hapura, por për proporcional mazhoritar. Problemi është i atyre që e propozuan në këtë mënyrë. Por gjithsesi mund ta sjellin qysh nesër propozimin e riformuluar”, tha ai. /Sot/ESMERALDA HIDA
