Ndërkombëtarët duket se këtë herë nuk do të lejojnë dyshen Meta-Berisha të prishin dialogun PS-PD. Presidenti e ish-kryeministri asnjëherë nuk e kanë parë me qejf afrimin Rama-Basha dhe reforma zgjedhore është një sinjal se palët po shkojnë drejt dialogut. Paktin e 2017 ata e shkatërruan, pasi Basha u dorëzua shumë shpejt.
Por këtë herë ambasadorët po negociojnë drejtpërdrejt dhe nuk po përfshijnë Metën e Berishën. Vetë ambasadorja amerikane po reagon çdo ditë për zgjedhoren dhe ja u ka bërë të qartë palëve se ajo duhet të mbyllet brenda 31 majit. Opozita po nxjerr pretekste që të bjerë dialogu, por ambasadorët duket se nuk do e lejojnë. Burime të gazetës thanë se Meta e Berisha nuk e dua reformën zgjedhore pasi shohin si një skenar për të shkuar te takimi Rama-Basha. Nëse shihen deklarimet publike të të dyve, që kur u krijua Këshilli Politik ishin skeptikë. Por duket se falë presionit ndërkombëtar, të hënën do kemi një Kod të ri Zgjedhor dhe ajo që bie në sy është se këtë herë Meta e Berisha janë larg procesit.
Anashkalimi i Metës
Dje ambasadorja Kim vlerësoi thirrjet e Metës për zgjedhoren, por në të vërtetë ajo nuk ka pasur asnjë takim më kreun e shtetit për këtë çështje. Këtë javë Kim takoi Ruçin, Ulsi Manjën, Vasilin, Gjiknurin, Bylykbashin, Bashën dhe shumë emra të tjerë, por askush nuk shkoi në zyrën e Metës.
Ambasadori gjerman po ashtu pati disa takime të rëndësishme, mes të cilëve bie në sy takimi me Bashën. Vendi ndodhet në një krizë politike dhe presidentët në raste të ngjashme kanë qenë vendimtarë në sheshimin e përplasjeve. Por goditjen më të madhe e ka marrë ish-kryeministri Berisha. Deri para një viti ambasadorët më shumë hynin e dilnin në zyrën e tij sesa në atë të Bashës. Kur Donald Lu dhe Romana Vlahutin morën detyrat si ambasadorë në vendin tonë, ndër takimet e tyre të para i kishin me Berishën.
Madje Lu edhe kur iku pati një takim lamtumire me ish-kryeministrin. Sa herë që është negociuar për dialog politik, ambasadorët shkonin fillimisht te Basha e më pas te Berisha. Por qëkur Soreca dhe Kim janë emëruar ambasadorë të SHBA-BE nuk kanë shkelur në zyrën e Berishës. Ambasadori i BE ka gati një vit që është emëruar dhe nuk ka pasur asnjë takim me Berishën. Yuri Kim u emërua këtë vit, por edhe ajo nuk ka pasur asnjë bisedë, qoftë dhe virtualisht me ish-kryeministrin. Kjo javë është vendimtare për dialogun PS-PD për zgjedhoren dhe sërish Meta e Berisha kanë mbetur jashtë. Sa herë që Rama-Basha kanë shkuar drejt konsensusit dyshja Meta-Berisha i kanë prishur planet dhe si duket ndërkombëtarët e kanë nuhatur, duke i lënë të dy jashtë bisedimeve dhe po përqendrohen direkt te Rama e Basha.
Të gjithë kundër Metës
Përveç takimeve, presidenti Ilir Meta ka marrë goditje të fortë nga ndërkombëtarët për platformën e tij me 14 pika, e cila ka si qëllim rishikimin e reformës në drejtësi. E para ishte ambasadorja amerikane ajo e cila deklaroi hapur se nuk do të lejojë asnjë pazar për reformën në drejtësi dhe atë zgjedhore. Por kundër Metës kanë dalë dhe të gjithë ambasadorët e tjerë.
Ambasadori i BE, Luigi Soreca po ashtu ka kërkuar që reforma në drejtësi të ecë para dhe të mos ketë asnjë. Shefja e ONM po ashtu deklaroi se reforma në drejtësi po ecën para dhe nuk mund të ketë asnjë kthim pas. Pra të gjithë janë kundër presidentit duke hedhur në erë planet e tij për të minuar reformën në drejtësi. Dje Meta doli në një deklaratë shtypi dhe dukej qartë që ndjehej i mënjanuar nga bisedimet për t’i dhënë fund ngërçit politik.
“Përpjekjet e mia të sinqerta dhe transparente për të bashkuar vendin dhe ndërtuar një konsensus gjithëpërfshirës mbi axhendën e reformave të integrimit europian të Shqipërisë, për fat të keq u minuan. Tashmë secili aktor le të marrë barrën e përgjegjësive të veta përballë qytetarëve dhe partnerëve europianë. Unë do të kaloj tani më pak kohë me Tiranën politike, dhe do t’i përkushtohem më shumë Shqipërisë së njerëzve të thjeshtë”, tha ai. /Nga Kliti Topalli
