Shtohen akoma dhe më tej dyshimet mbi vizitën e ish-ambasadorit Richard Grenell në vendin tonë. Gazeta bëri disa artikuj mbi këtë vizitë, ku Grenell u takua me presidentin Ilir Meta zyrtarisht dhe jo zyrtarisht me kryeministrin Edi Rama.
Ai u strehuar në një resort që drejtohet nga një biznesmen i afërt me presidentin Meta. Por vizita e tij ka tërhequr edhe vetë vëmendjen e mediave amerikane. “Zëri i Amerikës” në gjuhën serbe ka bërë një artikull mjaft të gjatë ku hedh dyshime mbi vizitë e tij.
Sipas këtij artikulli, Grenell nuk ka më asnjë rol në administratën amerikane dhe po ashtu nuk ka asnjë të dhënë që ai t’i jetë futur sektorit privat, sikundër pretendoi në një intervistë. Vetë “VOA” është interesuar pranë institucioneve amerikane dhe ai nuk figuron askund. Sipas artikullit, dyshohet se Grenell po bën PR e liderëve politikë të Ballkanit.
Po ashtu në artikull tregohet se ai ka lidhje dhe me Viktor Orban. Ky artikull duket se rëndon pozitat e presidentit Ilir Meta, pasi edhe në SHBA kanë ngritur mjaft pikëpyetje për këtë vizitë të fshehtë të Grenell. Gazeta më poshtë po jep artikullin e plot të VOA.
Artikulli i VOA
I dërguari i ish -presidentit amerikan Donald Trump për dialogun midis Serbisë dhe Kosovës, Richard Grenell, kohët e fundit u pa përsëri në Ballkanin Perëndimor. Ai qëndroi në Serbi dhe Shqipëri, u takua me politikanë, doli natën dhe kërkoi mundësi biznesi.
Meqenëse ai nuk është më në administratën amerikane, nuk është e qartë kur ose në interesin e kujt Grenell po punon tani, shkruan “Zëri i Amerikës”. Ish i dërguari amerikan për Kosovën postoi në Instagram një video nga një festë në një klub nate në Beograd me ministren serbe të Financave Sinisa Mali.
Ai gjithashtu postoi në Instagram fotografi me Presidentin shqiptar Ilir Meta dhe Kryeministrin Edi Rama, dhe më pas postoi fotografi nga bregdeti shqiptar, me pak detaje se çfarë po bënte në Shqipëri. Zëri i Amerikës u përpoq ta kontaktonte përmes ish -bashkëpunëtorëve të administratës, të cilët thanë se nuk kishte informacion se ku punon tani dhe nuk kishin as kontaktin e tij.
Instituti për Politikë dhe Studime Strategjike i Universitetit Carnegie Mellon u përgjigj se Grenell nuk punon më atje, megjithëse në faqen e internetit të organizatës së tij “Fix California” të cilën e themeloi kur u spekulua se ai do të kandidonte për guvernator të Kalifornisë, thuhet se punon aty,. Gjatë vizitës së tij në Ballkan, Grenel tha në një intervistë për “Neës 24”, televizion shqiptar, siç raportohet nga portali Kosova online, se ai merret me promovimin e investimeve të huaja dhe bashkëpunimin ekonomik në rajon, por nuk tha ku ai punon, përveç në sektorin privat.
“Vizioni i Presidentit Trump për dialogun mes Kosovës dhe Serbinë, kishte të bënte me krijimin e vendeve të punës, me ekonominë, ideja ishte që rajoni i Ballkanit të ecte përpara… Jam në sektorin privat, dhe ne jemi duke parë mundësitë për të krijuar një sektor privat për investimet e huaja në Ballkan. Këtu jemi për të parë projekte të ndryshme, për të kuptuar më mirë kë investitor duhet të sjellim për investimet e huaja”, tha Grenell.
Përpara se të vinte në administratën Trump, Grenell themeloi zyrën e konsulencës “Capitol Media Partners” në 2009, e cila funksionoi deri në 2017, dhe për të cilën CNN njoftoi se gjithashtu përfaqësonte klientë nga Kina, Somalia, Irani – e cila nuk u raportua tek autoritetet, edhe pse sipas ligjit duhet të ishte raportuar. “Ëashington Post” një herë njoftoi se kompania e Grenell gjithashtu përfaqësonte një organizatë të financuar nga partia e kryeministrit hungarez Viktor Orban.
“Për shkak të biografisë së tij dhe mënyrës sesi ai vepron tani, dhe se si ai veproi ndërsa ishte në administratë, dhe këtu pas mandatit të tij, unë besoj se Richard Grenell ka marrëdhënie të ngushta jo vetëm me autoritetet në Serbi, por edhe me autoritetet në Shqipëri, është e dukshme.
Në rrjetet sociale, nga njëra anë, ai vlerëson dhe promovon autoritetet në Beograd dhe Tiranë, ndërsa nga ana tjetër, ai nuk është në favor të autoriteteve në Prishtinë”, tha Nemanja Todorovic Stiplija, redaktor i portalit Evropian të Ballkanit Perëndimor. Që nga fillimi, Grenell mbështeti nismën e Mini-Shengen apo Ballkani i Hapur. Në atë kontekst, ai vlerësoi udhëheqësit e Serbisë dhe Shqipërisë, dhe i tha Kryeministrit të Kosovës Albin Kurti se ai bëri “gabim” që refuzoi t’i bashkohej nismës rajonale dhe se lavdërimet për Aleksandar Vuçiç dhe Edi Ramën mund të përdoren politikisht në disa fronte, thotë Stiplija.
“E thënë thjesht, Richard Grenell mund të jetë një PR për publikun në Serbi dhe Shqipëri për të shpjeguar se udhëheqësit e dy vendeve janë më të pranuar në botë sesa mendon publiku, nga njëra anë mund të jetë PR i brendshëm dhe nga ana tjetër për çështje të tjera që lidhen me rajone të tjera dhe jo me Shtetet e Bashkuara”.
Richard Grenell shërbeu së pari si ambasador i SHBA në Gjermani në administratën Trump. Pastaj, paralelisht me atë punë, ai punoi si i dërguar special për negociatat midis Serbisë dhe Kosovës, të cilat arritën kulmin me nënshkrimin e Marrëveshjes së Uashingtonit për normalizimin e marrëdhënieve ekonomike.
Pozicioni i tij i fundit në administratë ishte Drejtor i Shërbimeve Kombëtare të Inteligjencës. Pasi mbaroi punën e tij në administratë, u spekulua se Grenell do të kandidonte për guvernator të Kalifornisë, nga i cili hoqi dorë. Ai shfaqet herë pas here në TV kabllor “Neësmax”, i cili njihet si TV afër Trump. Për shkak të mënyrës se si ai punonte, ata e quanin “Trump i vogël”.
