Zbardhen prapaskenat pse u shty komisioni hetimor për inceneratorët. Partia Demokratike kërkoi ngritjen e 3 komisioneve hetimore në Kuvend. Bëhet fjalë për Komisionin Hetimor për Zgjedhjet parlamentare të 25 prillit, për çështjen Becchetti si dhe për Inceneratorët.
Partia Socialiste u pozicionua pro ngritjes së komisioneve për inceneratorët dhe zgjedhjet e 25 prillit, ndërsa paralajmëroi votën kundër atij për Becchettin. Për rrjedhojë ngritja e tre komisioneve ishte pjesë e rendit të ditës së seancës plenare të së enjtes që lamë pas. Kështu, ngritja e komisionit hetimor për përdorimin e administratës për zgjedhjet e 25 prillit u votua me 123 vota pro, 0 kundër dhe 0 abstenim, Komisioni Hetimor për “Becchettin” u rrëzua me 46 vota pro dhe 77 kundër, ndërkohë që u shty ngritja e Komisionit Hetimor për “Inceneratorët”.
Ja pse u shty Komisioni
Por gazeta ka mësuar detaje se përse u shty ngritja e Komisionit Hetimor për “Inceneratorët”, vendim ky që duket se gjeti dakordësinë e deputetëve të opozitës dhe mazhorancës. Burime të sigurta i thanë gazetës se për shkak se çështja e inceneratorëve është nën hetim nga Struktura e Posaçme Kundër Krimit të Organizuar dhe Korrupsionit, deputetët e PD dhe PS kanë pasur frikë se ngritja e komisionit mund të ndikojë në vijimësinë e hetimit të kësaj çështje, që sipas burimeve nga SPAK janë drejt fundit.
Kështu që duke qenë se hetimet e Prokurorisë së Posaçme janë drejt fundit për dosjen e “Inceneratorëve”, por edhe për disa dosje të tjera sikundër janë koncesionet, opozita dhe mazhoranca e panë të udhës që të shtyjnë ngritjen e komisionit hetimor në fjalë. Pra, shkaku pse u shty ngritja e Komisionit Hetimor për “Inceneratorët” ka qenë SPAK, e cila është drejt mbylljes së hetimeve për këtë çështje dhe deputetët janë të internuara se çfarë do të dalë në dritë ky hetim.
Priten arrestime ministrash dhe ish-ministrash
Mirëpo duke qenë se çështja e inceneratorëve, por edhe koncesioneve kanë shkaktuar debat të madhe politik dhe jo vetëm, mësohet se Prokuroria e Posaçme, pritet të bëjë arrestime ministrash dhe ish-ministrash që janë të përshirë në këto çështje. Sipas informacioneve, mësohet se SPAK ka mbyllur hetimet për dosjen e “Inceneratorëve” dhe në ditët në vijim pritet të lëshojë disa urdhër arreste për ministra dhe ish-ministra që kanë shkelur ligjin dhe shpërdoruar detyrën. Madje një gjë e tillë është paralajmëruar në datën 15 tetor të këtij vite edhe nga ish-deputeti Myslim Murrizi.
Ky i fundit teksa ishte ftuar në një studio televizive theksoi se brenda muajit tetor do të arrestohen 3 emra të njohur. “Do të ketë arrestime ish-ministrash javën që vjen ose brenda muajit tetor. Kam informacioneve që flas, se unë nuk shoh filxhan. Nuk di të them se të kujt partie kanë qenë, por hajduti nuk ka parti. Por do ketë arrestime të ish-ministrave. Po të vini re në Kuvend u shty komisioni hetimor për inceneratorët, ndoshta dhe ata kanë informacion se SPAK mund të ketë vepruar para tyre dhe mund të arrestojë ndonjë ish-ministër dhe për këtë ata kanë thënë pse duhet ta ngremë presim deri seancën tjetër”, deklaroi Murrizi.
