Vendimi i Departamentit të Shtetit për të shpallur të padëshiruar ish-kryeministrin Sali Berisha ka shkundur politikën shqiptare. Prej tre ditësh ky vendim vijon që të jetë kryefjalë e mediave dhe diskutimeve, pasi akuzat e amerikanëve ndaj Berishës janë vërtet të forta.
Ish-kryeministri vendosi të kundërpërgjigjet duke paralajmëruar një padi ndaj Sekretarit Blinken, ndërsa ka lënë të nënkuptohet se këtë gjë ia ka bërë George Soros me Ramën. Por a mund të kenë ndikuar emra të jashtëm në këtë vendim? Ambasada e SHBA në Tiranë, midis shumë detyrave të saj funksionale përpiqet të përmbushë edhe aktivitete faktmbledhëse për çështje të korrupsionit dhe të shkeljeve të të drejtave të njeriut, të cilat më pas i referon në “deskun” përkatës që mbulon rajonin tonë në Departamentin e Shtetit.
Interesi i këtij të fundit në këtë rast është që të ndëshkojë ata politikanë dhe ato lloj veprimesh, të cilat cilësohen rrezik i madh global, madje edhe ndaj vetë interesave amerikane në botë. Pas kësaj procedure fillestare, për fakte të lidhura me çështje që zgjojnë interes politik, gjeostrategjik dhe diplomatik, Departamenti i Shtetit kërkon në mënyrë specifike të dhëna shtesë dhe plotësime të përditësuara, të cilat i përcillen me anë të kabllogrameve diplomatike nga ambasadat amerikane në rajone të ndryshme të botës.
Në momentin kur dokumentacioni i mbledhur vlerësohet si sensitiv dhe mjaft i rëndësishëm për ndjekje të mëtejshme, seksioni përkatës rajonal në Departamentin e Shtetit krijon një dosje të posaçme, duke hartuar relacionet dhe analizat e duhura, të cilat i përcillen sipas varësisë Ndihmës Sekretarit të Shtetit që mbulon rajonin. Po ashtu dosja përcillet edhe me një raport të shkurtuar informativ për njohje në nivelet më të larta politike sipas rastit në disa komisione të Kongresit.
Në varësi nga natyra e shkeljeve, rrethanave, qëndrimeve diplomatike dhe gjeostrategjike, Sekretari i Shtetit Amerikan ka të drejtë që duke njoftuar paraprakisht Presidentin e SHBA dhe Kongresin të firmosë aktin e personit “non grata”, i cili i njoftohet përveç autoriteteve konsullore amerikane në vendin përkatës edhe vetë personave të prekur, por në mënyrë konfidenciale.
Sekretari i Shtetit në bashkëpunim me Kongresin vendos në një moment të dytë nëse një vendim i tillë do të bëhet publik apo jo, duke konsideruar një sërë ndikimesh dhe mesazhesh diplomatike që kërkon të japë nëpërmjet këtij vendimi në shtetin apo rajonin përkatës.
Në rastet kur dosja voluminoze në të cilën mbështetet vendimi non grata ka prova të qenësishme që përbëjnë vepra të rënda penale, ato mund të bëhen publike dhe njëkohësisht mund t’i referohen për hetime të mëtejshme gjykatave ndërkombëtare dhe kombëtare.
Vendimi u mor nga Trump
Pra, nëse shohim më lart duhet një punë shumë voluminoze për të futur një person në listën e zezë, për të mos thënë se duhen vite të tëra pune faktmbledhëse. Administrata e re në SHBA e ka marrë detyrën në fund të janari. Pra vendimi ndaj Berishës është marrë fiks 4 muaj pas marrjes së detyrës nga Biden.
Pyetja që shtrohet është? Administrata e DASH nuk kishte punë të tjera, por sapo mori detyrën nisi me urgjencë procedurat kundër Berishës? Pra mund të thuhet qartësisht se për shkak të punës së gjatë që duhet, vendimi ndaj Berishës është marrë gjatë administratës “Trump”, kur Sekretar i Shtetit ka qenë Michael Pompeo.
Po ashtu mësohet se njoftimi për shpalljen “non grata” ka ardhur në rrugë diplomatike dhe i është njoftuar Sali Berishës në fund të vitit 2018. Që nga ai moment, asnjë diplomat amerikan dhe europian nuk e ka vizituar zyrën e Berishës, përfshirë këtu edhe ambasadoren e re Yuri Kim.
DASH nuk mund ta merrte këtë vendim pa u konsultuar me ambasadoren. Duhet theksuar se Kim erdhi në Tiranë me firmën e Donald Trump. Të gjitha këto rrëzojnë edhe pretendimet e Berishës për përfshirje të Soros. Të gjithë e dimë se mes Trump dhe Soros ka një armiqësi të përjetshme. Nuk ka se si Soros të ketë ndikuar te republikanët./Nga Kliti Topalli
