Gjatë ditës së nesërme Komisioni Evropian do të publikojë masat e reja për lehtësimin e lëvizjes së njerëzve brenda kufijve të brendshëm “Schengen”, sidomos për turizmin dhe punëtorët sezonalë.
Nga ana tjetër kufijtë e jashtëm ‘Schengen’ do të jenë të mbyllur të paktën deri më 15 Qershor përveç marrëveshjeve të përkohshme për riatdhesimet dhe lëvzjen e përkohshme të kontrolluar të punëtorëve sezonalë siç është rasti me ata shqiptarë drejt Greqisë.
Gjatë diskutimit online në Komitetin për Çështjet e Brendshme, eurodeputetët kritikuan mungesën e koordinimit mes shteteve anëtare.
“Shumë njerëz kanë frikë se një e ardhme e zymtë e pret zonën Schengen nëse vendet anëtare nuk i rihapin shpejt kufijtë. Vitet e fundit kanë dëshmuar se qeveritë janë të shpejta në rivendosjen e kufijve, por të ngadalta dhe shpesh hezitojnë kur bëhet fjalë për heqjen e tyre. Unë nuk mund të pranoj veprimet e deritanishme të njëanshme nga disa shtete evropiane”, ka thënë Tanja Fajon.
Mos hapja e plotë e kufijve Schengen do të sjellë humbje prej 5 miliardë deri në 18 miliardë Euro në vit në ekonominë e shteteve anëtare.
Disa linja ajrore në Britaninë e Madhe, Austri, Rumani, Bulgari e Portugali kanë rifilluar fluturimet, por pasagjerëve që kryesisht janë punëtorë sezonalë apo shtetas të mbetur të bllokuar po ju kërkohet të mbajnë maska, doreza dhe të paraqesin testet negative ndaj COVID-19 ndërsa në mbërritje i pret karantina e detyrueshme 2-javore ose teste në aeroporte në vlerën deri në 200 Euro.
Komisioni Evropian ka po ashtu pranuar kërkesën nga kompanitë ajrore që në rast anulimi të fluturimeve për shkak të pandemisë të ofrojnë kuponë të vlefshëm të paktën 12 muaj në vend të një rimbursimi të plotë të vlerës së biletës.
