Nga Anri Bala
Më në fund edhe reforma u votua, u miratua dhe tani do i shohim hajrin “nëntedhjet e nënçes”. Nuk e di nëse e dëgjuat apo lexuat, se miratimi i saj, mori plot 99 vota dhe me të drejtë do të quhet reforma e 99-çave, kurse qindshat rrinin në rrugë dhe gëzonin, por edhe shfrynin e mallkonin, pa e kuptuar se përse.
Nuk kanë humbur asgjë, por edhe nuk kanë fituar asgjë, janë aty ku ishin dikur, ku sipas tyre i vidhnin, u vidhnin, atë që nuk i kishin të tyren, votën e qytetarit, ndaj ata… humbnin. Por tani i’a hodhën, sepse e gjetën burimin e fatkeqësisë “humbje”… identifikimin e votuesve.
Ky ligj, është “ylli” i reformës, teknologjia vëlla, shok, militant, ushtarë e mercenar, është çelësi i të “vërtetës”, ndaj ndaloni, se nuk ia futni dot partisë… do ju identifikoi.
Të thuash se ke bërë reformë në kohën e teknologjisë perfekte, vetëm se do kemi disa pajisje që do verifikojnë votuesit, vërtetë është gjëja më qesharake. Të thuash që ke bërë reformë, kur partia me ushtarët e saj të numëroi dhe mandatoi votën e qytetarit, është tallje e madhe.
Të thuash se ke bërë reformë dhe partia të gjej gjithfarë kllouni, që as qurrat e tij nuk di t’i fshijë, për të përfaqësuar me mijëra qytetarë, sepse paguan nga lekët e grabitjes së padënuar, por të legalizuara nga pushteti në pushtet, është paturpësi e madhe. Të thuash se kam bërë reformë, vetëm se kam dëgjuar ca këshilla pa asnjë vlerë të një organizate si OSBE-ODHIR, që nuk ndryshojnë asgjë mbi realitetin e votuar, është gënjeshtër e madhe.
Natyrisht, që shumica e votuesve donin seriozisht ndryshime, që vota e tyre të mos tjetërsohej dhe në vendin ku flet sovrani, kur ata janë duke u rropatur për të nxjerrë bukën e gojës, të dëgjohej dhe zëri i dhimbjes dhe i vuajtjeve të tyre, por e pamundur… janë shumë larg.
Gjysma e votuesve shqiptarë në emigracion tashmë, janë jashtë sistemit të votimit, jo se është e vështirë, por janë të padëshiruar, sepse balancat do ndryshonin, natyrisht jo në krah të emigrantit holandez, sepse kurrë nuk do votonin për një thes miell, një vend pune si shpërblim, për militantizmin dhe paaftësinë.
Një rast i humbur dhe i shpërdoruar turpësisht nga kjo klasë politike mediokre, e cila voton dhe shkatërron, sikur do jetë gjithmonë në pushtet dhe nuk e kupton se vjen një ditë krejt papritur… llogaridhënia.
Ndërsa qajnë e qeshin me mos hapjen e listave, që në të vërtetë nuk do hapen kurrë, pa u ndryshuar sistemi në maxhoritarë të pastër, ata bëjnë humor gjoja si të zhgënjyer dhe trembur nga listat e hapura, sepse as në ëndërr nuk mund ta shikosh, që në një listë qarku të fitosh 30% të kandidatëve dhe këtë partia e di mirë dhe e ka në dorën e saj të ligjëruar.
Ndërsa kuja dhe vaji për koalicionet parazgjedhore, ku shqiptarët do “shkulin” leshrat e kokës nëse nuk kanë deputet dashrat, nardat, ballijtë e vegjël apo sali-jaranët e parlamentit, brahimllarët apo kedat dhe bullarët, që edhe studjojnë, edhe punojnë dhe përfaqësojnë injorancën, si përfaqësues të një populli me arsim-paarsim, nuk do pushojë dhe ne do i’a dëgjojmë krismën pas zgjedhjeve, kur të shohim se asgjë nuk ndryshoi dhe për shumë kohë, do jemi aty ku ishim.
Ndaj, akti i fundit i komedisë për shqiptarët e Shqipërisë, i të ashtëquajturës reformë, ku kryetari liston, populli voton dhe partia numëron, me bekimin e 99-çave, është një tallje dhe shuplakë e rëndë për çdo qytetarë që voton për të ardhmen, por fiton të shkuarën, sepse këtë vend nuk e drejtuan kurrë shtetar qytetari, por pushtetari hajdut-injorant-zagari!/Ekskluzive.al
