Bashkimi Europian do të vendosë sot për hapjen e negociatave me Shqipërinë. Në mbledhjen që do të mbajë Këshilli Europian qeveria shqiptare do të paraqitet e përgatitur, duke premtuar goditje të bujshme të krimit të organizuar dhe korrupsionit në nivele të larta në muajin tetor.
Dy pikat kryesore për integrimin e vendit tonë janë reforma në drejtësi dhe reforma zgjedhore. Kështu për të siguruar një dritë jeshile nga vendet anëtare të unionit, qeveria ka shprehur angazhimin e plotësimit të këtyre kushteve kryesore. Ngritja dhe funksionimi i organeve të drejtësisë për të luftuar krimin e organizuar dhe korrupsionin në nivele të larta do të jetë prioriteti i qeverisë.
Në bazë të një kalendari të hartuar nga qeveria të quajtur “Plani i integrimit”, në të cilin përcaktohen afatet kohore brenda të cilave mendon të ketë zgjidhur çështjet kryesore që i kërkohen nga Këshilli Europian para se Shqipëria të ulet në tryezën e parë ndërqeveritare të negociatave me Brukselin. Në këtë kalendar theksohet rikthimi në funksionim të Gjykatës Kushtetuese.
Në këtë pikë, qeveria parashikon që brenda muajit korrik Këshilli i Emërimeve në Drejtësi të ketë përfunduar procesin e vlerësimit, pikëzimit dhe renditjes së kandidatëve për 3 vendet vakante, ndërsa plotësimi i Gjykatës Kushtetuese me 6 anëtarë përfshirë betimin e tyre, pritet të ndodhë në tetor të këtij viti. Po në tetor parashikohet që Gjykata e Lartë, të plotësohet fillimisht me një minimum prej 6 anëtarësh, për të kaluar në fund të vitit 2020 me 10 anëtarë, gjë që do t’i lejonte kryerjen e të gjitha llojeve të gjykimeve, me përjashtim të atyre nga Kolegjet e Bashkuara.
Do të duhen më pas edhe tre muaj të tjerë që brenda marsit 2021, Gjykata e Lartë të bëhet e plotë me 12 anëtarë, duke dërguar kështu edhe treshen e saj në Gjykatën Kushtetuese.
Lufta ndaj korrupsionit
Tetori 2020 është edhe afati brenda të cilit Këshilli i Lartë i Prokurorisë duhet të ketë plotësuar Prokurorinë e Posaçme Antikorrupsion me 15 prokurorë, së bashku me Byronë Kombëtare të Hetimit. Lufta kundër korrupsionit dhe krimit të organizuar do të shoqërohet me një plan veprimi për adresimin e krimit financiar. Ndryshimet ligjore të kërkuara kundër pastrimit të parave pritet të prezantohen brenda qershorit, për t’u miratuar në tetor 2020. Pra muaji tetor do të jetë periudha kur do të nisë edhe reprezalja më e madhe.
“Plani i Integrimit: Lufta kundër korrupsionit dhe krimit të organizuar, analiza e rrezikut në produktet dhe shërbimet bankare. Keqpërdorimi i personave juridikë për pastrim parash- Qershor 2020; Analizat e rrezikut në lidhje me pasuritë e patundshme dhe agjentët dhe avokatët në fushën e pastrimit të parave- Shtator 2020; Prezantimi i projektligjit për regjistrin qendror mbi pronësinë- Qershor 2020; Miratimi i paketës ligjore- Tetor 2020”, thuhet në planin e integrimit.
Reforma zgjedhore
Një tjetër pikë kryesore për hapjen e negociatave është edhe miratimi i reformës zgjedhore. Për këtë reformë, qeveria ka menduar që ta ndajë në dy etapa. Brenda korrikut 2020 është planifikuar të miratohet drafti i Këshillit Politik, përfshirë financimin e fushatave elektorale.
Ndërsa miratimi i ligjit të posaçëm për financimin e partive është planifikuar për në tetor të këtij viti. “Plani i integrimit, reforma zgjedhore: Miratimi i reformës zgjedhore, përfshirë financimin e fushatave- korrik 2020; Miratimi i ligjit të posaçëm për financimin e partive politike- tetor 2020”, thuhet në planin e integrimit të miratuar nga qeveria. /NGA ELISJEDA KIKO
