Nga Anri Bala
Duam apo nuk duam ne, me dhjetra individë, pjesë e pushtetit dhe qeverisjes, janë akuzuar, arrestuar, hetuar dhe ca prej tyre burgosur… si të korruptuar. Natyrisht, që korrupsioni nuk është pajë që merret në shportën e nuses dhe as abetare që mësohet në shkollat e rinisë, por ves, që përvetësohet kur hapen dyert e shtëpisë dhe thesaret e shtetit u rrinë përpara syve pa rojtar e zot, duke i futur në ngasje të gjithë ata që janë aty, për të marrë pjesën që u kanë thënë… se u takon.
Ju kemi dëgjuar edhe kur zotoheshit se do të ngrinit një administratë me meritokraci dhe devocion, por “deleujqërit” që mblodhe rreth pushtetit të ardhur nga një pushtet tjetër, të bënë ta harrosh postulatin e qeverisë tënde, me turmat e kunetërve, vëllezërve e motrave, bijëve dhe bijave të pushtetarëve ose ish pushtetarëve, edhe të atyre që ishin larguar nga kjo botë, por edhe të atyre që po ngjisin shkallët e pushtetit, të ngritur nga hiçi në piedestalin e së keqes.
Administrata e ngritur nga këto mënxyroman, është më e keqja në performancë nga të gjithë administratat majtiste dhe kjo i hap ca punë drejtësisë, duke mos e lënë të kthehet mbrapa, për tu marrë me mënxyro-katallanët e të shkuarës. Ndaj mos u ankoni me drejtësinë, se po merret vetëm me ju… jeni ju që nuk po i lini kohë të merren me të tjerët, aq shumë sa jeni shtuar!
Për t’i qëndruar besnik për herë të fundit, të asaj që deklaruat, se ne mund të jemi edhe problemi edhe zgjidhja, shtërngojeni pak dorën… mos ia mohoni fëmijëve Evropën duke u varur mëlçitë në qafë ujqërve të pangopur, të pushtetit bujar.
Nuk të nxjerr të pafajshëm teza mbrojtëse që përdor sa herë të lipset nevoja, se faji është individual, sepse nuk ka ujk që nuk do i hante mëlçitë, duke i parë të varura në qafë! Vërtet mendoni, se kasapi që i’a ka varë… është i pafajshëm?!/Ekskluzive.al
