Nga Anri Bala
Për të 10-ën herë kam dëgjuar pyetjen pa përgjigje, që Rama ia bën Metës: “Ilir, pash Zotin, çfarë borxhi të kanë shqiptarët?”, e unë do t’i shtoja me të drejtë pyetjes së kryeministrit: “… ç’taksirat kanë shqiptarët, që të shohin ende surratin tënd që ulëret për “drejtësi”, tipik modeli i hajdutit, kur bërtet kapeni hajdutin, e që nuk ngopesh dhe nuk pushon së ngatërruari dynjanë në Shqipëri e matanë?”.
Se me thënë të drejtën, na është bërë pak e bezdisëshme kjo punë, jo për gjë, po u lodh e u këput edhe Rama, që ti t’ia “varësh nga pak”, e për bela, ngaqë pyetjen ta bënë Rama e ti i hiqesh indiferent e hatërmbetur, harron se ajo pyetje është edhe e jona, e kështu na duket sikur “avazxhiu” na fyen duke na thënë… bjerini bjerini, se i bini bukur!
Në fakt, ashtu e ke thenë, se dole me zë dhe figurë! Dole duke kërcënuar, jo qeverinë jo, as Ramën, se ata mbrohen vetë, por ne! E këtë e bënë nga fodullëku, duke menduar se na ke futur në haurin tënd, ku çdo ditë deklaron, se je i “dërguari” i Zotit, që udhëheq 3 milion bij të mërzitur, larg nga muret e Rilindjes, që sipas teje zotrote, janë gati për të të ndjekur drejt shpëtimit… në greminë. Sa keq, që mburreni me hijen e pushtetit të rremë!
Na konsideroni të varfër dhe të nëpërkëmbur, sepse për ne, nuk mbeti asgjë nga ato që Zoti, nga bujaria i’a dhuroi këtij vendi të bekuar…! E në fakt, duhet të ishim më të pasurit nga fqinjët rreth e rrotull, nëse ti dhe ushtar-zagarët e tu të sofrës së pushtetit, nuk do të na vidhnit si të babëzitur. Në fakt, ju vjedhjen e kthyet në shkollë, e përsosët, e çuat një shkallë më lartë, e kthyet në profesion, e partinë e kthyet me klasa me hajdutë, prej nga dilnin “kuadrot” e pushtet-zgrapjes së radhës.
Mandej, kur kujtuam se këta skifterë kishin ikur pa u ndëshkuar, duke na fyer dhe poshtëruar, e kur gëzonin bashkë me ju hisen e plaçkës së dhuruar, pas largimit nga pushteti, krejt papritur, na doli sot përpara fotoja e juaj me një oligark, që bashkë me shokët i kishte “rrubatur” shqiptarëve, plotë 1.5 milion euro me AKBN-në.
AKBN-ja e famshme, që e drejtuat për vite të tëra, na doli si fantazmë përsëri përpara, duke na kujtuar bijtë e hajdutërisë, që i hodhët në rrugë pa i dërguar pas hekurave, sepse do i’u duheshin më vonë Besjanët dhe Panot, që megjithëse nuk dinin as të ngrinin brekët e tyre, u bënë mbrojtës të thesarit më të madh të Shqipërisë.
AKBN, ky thesar si i Ali Babës, ku nafta, ari i zi vërshonte lum, kromi, bakri, nikeli, kallaji, floriri, etj… dhe gjithë këto lumenj parashë, kalonin para syve të shqiptarëve dhe derdheshin në xhepat e ushtarë-zagarëve të SHPK-së tuaj, ku dhe zagari më i vogël nga stani juaj, arriti të grabis miliona, sepse ju jeni akoma në shtet dhe pushtet me kostum të ndryshuar!
A mos vallë na pandehni për të paditur, që nuk kuptojmë kur oligarkomafiozët tuaj, pjellë e të ashtëquajturës parti, nën emra të vëllait, kunatit, vjehrrit… kanë privatizuar dhe gllabëruar djersën dhe gjakun e këtij populli, që pret t’iu ndjek ju… për tu çliruar nga varfëria?!
Këtij populli, që u gënjye dhe u zhgënjye… kur u ndërruan pushtetet, sepse ju, jo vetëm që nuk ikët… por u ngritët, qëndruat të “pamposhtur”, madje lulëzuat ashtu nga hiçi, si kërpudha pas shiut pusht-bizneset tuaja, ku nuk latë asgjë pa privatizuar dhe gllabëruar, që nga miniera e Bulqizës e deri tek nafta e Mallakastrës, që nga bakri i Mirditës e deri tek nikeli i Prrenjasit duhet t’i ktheni gjënë e grabitur… që të qetësohet.
Fotografia juaj, krahë oligokriminelëve, që privatizojnë pasuritë kombëtare, ndërtojnë hotele dhe pallate me grabitje pronash të ligjit 7501, ku toka në përdorim ishte mashtrim, e ka induksion nga pallati i vjehrrit brigadier, që e bëri gjithë racën tuaj milionere.
Ndaj qetësohu dhe bëhu burrë, e mos na përgojo kur na quan të varfër, të varfëruar, të nëpërkëmbur e poshtëruar nga varfëria, sepse nuk jemi të varfër aspak… por jemi të vjedhur!
Nëse mendoni, se nuk jeni pjesë e bandës së hajdutëve, nuk i’a vlen t’iu kërkojmë borxhin… sepse ju mbroheni me pushtetin tuaj si pistoletë druri, që ty të duket armë gjigande, që mund të shfaros, cilindo që i del përpara.
Do presim kohën, që ti ose ato që të kanë dhënë lodrën, t’ju japin të shtyrën drejt humnerës… ose të hidheni vetë në humnerë, për të mos rënë në duart e xhelatit…drejtësi. Kështu, shpëtojmë edhe ne, edhe ti, edhe nëna Shqipëri… që ti e do aq shumë, sa je gati të japësh jetën për atdhe… por jo paratë e plaçkën. /Ekskluzive.al
