Partia Socialiste ka lëshuar valë të forta kritikash në drejtim të Këshillit të Lartë Gjyqësor. Kryetarja e KLGJ, Naureda Llagami raportoi ditën e djeshme në Komisionin e Ligjeve për punën e këtij institucioni, ku foli edhe për ngritjen dhe funksionimin në Gjykatën e Lartë. Llagami tha se deri në fund të vitit, KLGJ do të emërojë 10 gjyqtarë pranë kësaj gjykate, por për socialistët kjo nuk është e mjaftueshme.
Kreu i Komisionit të Ligjeve Ulsi Manja i dha ultimatum të prerë kryetares së KLGJ që të emërojë sa më parë gjyqtarët në Gjykatën e Lartë, në mënyrë që të plotësohen edhe vakancat në Gjykatën Kushtetuese. Sipas Manjës, plotësimi i Gjykatës së Lartë me 10 gjyqtarë është i pamjaftueshëm sepse nuk plotëson kuorumin e mjaftueshëm për emërimet në Kushtetuese. “Përtej funksionalitetit të Gjykatës së Lartë, që lidhet drejtpërdrejt me dhënien e drejtësisë, ne jemi shumë të interesuar si Kuvend që kjo gjykatë të bëhet funksionale një orë e më përpara, për të realizuar atë përgjegjësi që ka Gjykata e Lartë në plotësimin e vendeve vakante në Gjykatën Kushtetuese.
Duke iu referuar ligjit për Gjykatën Kushtetuese, më konkretisht nenit 7/ç të këtij ligji është i pamjaftueshëm plotësimi i Gjykatës së Lartë me 10 gjyqtarë që të plotësohet detyrimi kushtetues në raport me Gjykatën Kushtetuese.
Ligji e thotë qartë, mbledhja e Gjykatës së Lartë është e vlefshme vetëm kur marrin pjesë ¾ e numrit të përgjithshëm të gjithë gjyqtarëve, pra në 19 anëtarë dhe kandidati për të shkuar në gjykatën kushtetuese duhet të marrë 3/5 e votave”, tha Manja. Kreu i Komisionit të Ligjeve deklaroi më tej se argumentet që janë dhënë deri tani nga KLGJ nuk janë bindëse, duke i dhënë ultimatum që të plotësohen sa më parë në mënyrë që organet e drejtësisë të jenë sa më parë funksionale në shërbim të qytetarëve, për të zgjidhur një sërë çështjesh që kanë mbetur pezull.
“Referuar ligjit,plotësimi i Gjykatës së Lartë me 10 gjyqtarë e pamundëson bërjen funksionale të Gjykatës Kushtetuese. Zonja kryetare do të doja të fokusoheni në këtë drejtim sepse nuk më bindin këto argumente që ju dhatë. Ju disa herë iu referuat numrit të vogël për të mos cenuar gjykatat e Apelit dhe gjykatat e Posaçme nuk janë bindëse. Unë nuk e di kush janë indikatorët që keni marrë që keni arritur në këtë konkluzion dhe derisa vetingu nuk është problem për emërimin e gjyqtarëve në Gjykatën e Lartë është e pajustifikuar. Pra plotësimi i vakancave në Gjykatën e Lartë do të thotë plotësim i vakancave në Gjykatën Kushtetuese”, tha Manja.
Raporti i KLGJ
Kryetarja e KLGJ, Naureda Llagami, paraqiti ditën e djeshme veprimtarinë e këtij organi gjatë vitit të parë të konstituimit, si dhe gjendjen e sistemit gjyqësor në vend. Para Komisionit të Ligjeve, Llagami u ndal në prioritetet kryesore të punës së KLGJ, ku mes tyre theksoi nisjen e procesit të ri-funksionalizimit të Gjykatës së Lartë, ngritjen dhe funksionimin e gjykatave të Posaçme për Korrupsionin dhe Krimin e Organizuar.
“Përfundimin e procedurës së ngritjes në detyrë në Gjykatën e Lartë, nga radhët e gjyqtarëve për 6 pozicione të lira, 3 në fushën e së drejtës administrative dhe 3 në fushën e së drejtës civile dhe plotësimi i kësaj gjykate në një kohë sa më të shpejtë me të paktën 10 gjyqtarë. Përfundimin e procedurës së ngritjes në detyrë për 5 pozicione të lira, në Gjykatën e Posaçme të Apelit për Korrupsionin dhe Krimin e Organizuar dhe 5 pozicione të lira, në Gjykatën e Shkallës së Parë për Korrupsionin dhe Krimin e Organizuar dhe emërimin me prioritet të gjyqtarëve të cilët konfirmohen në detyrë nga organet e rivlerësimit kalimtar”, tha Llagami.
