Tërheqja e mazhorancës nga shkarkimi i presidentit Ilir Meta nga detyra, ka shkaktuar dje debate në mbledhjen e grupit parlamentar të Partisë Socialiste, ku disa deputetë socialistë kanë kërkuar llogari nga kreu i grupit parlamentar, Taulant Balla se përse u arrit në këtë konkluzion.
Të hënën u mblodh për herë të fundit komisioni hetimor parlamentar për hetimin e ligjshmërisë së veprimtarisë së presidentit Ilir Meta, ndërsa pas debateve u miratua me 6 vota pro raportit përfundimtar, ku në vend të kërkesës për shkarkim të kreut të shtetit, do t’i sugjerohet Kuvendit që të ndërhyjë në Kushtetutë dhe të rregullojë me ligj të veçantë veprimtarinë e tij. Por dje është mbledhur grupi socialist, ndërsa gazeta ka mësuar detaje nga ato që janë diskutuar aty.
Deputetët e PS irritohen me tërheqjen
Kështu sipas informacioneve, disa deputetët janë irrituar me vendimin e fundit të mazhorancës, e cila e amnistoi presidentin Meta, duke mos e shkarkuar atë, edhe pse prej një vitit rresht zyrtarët më të lartë të Partisë Socialiste si kryeministri Edi Rama, kreu i grupit të PS, Taulant Balla, madje edhe kreu i komisionit hetimor “Meta” Ulsi Manja, deklaronin se ishin të vendosur për ta shkarkuar kreun e shtetit.
Në këtë kontekst, mësohet se deputetët në fjalë kanë kërkuar shpjegime se përse ndryshuan kurs kaq shpejt dhe se për ta është e papranueshme që shkarkimi i Metës u kthye në lojë “hidh e prit”. Madje, sikundër pohuan të njëjtat burime, mësohet se deputetët që kërkojnë shkarkimin e Metës, janë shprehur se nuk iu dalin dot para mbështetësve në bazë, pas tërheqjes së mazhorancës dhe amnistisë që i bëri kreut të shtetit. Por mësohet se kreu i grupit parlamentar socialist, Taulant Balla ka siguruar vartësit e tij, se mazhoranca nuk u tërhoq, por reflektoi pas rekomandimeve të Komisionit të Venecias dhe se shumicës socialiste nuk i intereson që të hapë fronte lufte me institucionet shtetërore, siç është edhe Presidenca.
Ndërkohë mësohet se zoti Balla në këtë pikë ka kërkuar që në seancën e posaçme që do të zhvillohet për presidentin Meta, deputetët të votojnë pro raportit të komisionit hetimor, i cili në vend të kërkesës për shkarkim të kreut të shtetit, i sugjeron Kuvendit që të ndërhyjë në Kushtetutë dhe të rregullojë me ligj të veçantë veprimtarinë e tij.
Po ashtu, mësohet se Balla ka kërkuar nga deputetët që në seancën e djeshme plenare të votohet edhe kundër tre dekreteve të Metës, pra t’i rrëzojnë, sikundër janë ai për betimin e anëtarëve të Gjykatës së Lartë dhe atyre të SPAK, akti normativ i kthyer në ligj që sanksiononte gjobat për mosrespektimin e distancës në studiot televizive dhe ai për vetingun në Policinë e Shtetit. Ndërkaq, mësohet se shefi i deputetëve socialit ka kërkuar nga vartësit e tij që të votojnë edhe kundër heqjes së betimit të gjyqtareve kushtetues, duke ia lënë këtë të drejtë ekskluzive Metës.
Por irritimi me tërheqjen e mazhorancës përballë presidentit Ilir Meta, duke mos e shkarkuar atë, nuk ka qenë e vetmja çështje që shkaktuar debate në mbledhjen e djeshme të grupit parlamentar të Partisë Socialiste. Burime nga kjo mbledhje i pohuan gazetës se disa deputetë kanë kritikuar, madje kanë shfaqur rezerva për amnistinë fiskale, e cila ka hyrë në komisionit parlamentare me shpejtësi për t’u diskutuar dhe që pritet të votohet në Kuvendin e Shqipërisë gjatë këtij sesioni parlamentar.
Sipas informacioneve, mësohet se deputet ishin të shqetësuar dhe kanë kërkuar llogari se mos ndoshta kjo amnisti shfrytëzohet nga grupet kriminale dhe të korruptuarit për të pastruar paratë e tyre, duke i legalizuar. Megjithatë, edhe në këtë pikë zoti Balla i ka siguruar se gjithçka që do të bëhet është në të kri të qytetarëve dhe jo për të favorizuar të inkriminuarit dhe të korruptuarit. Nga ana tjetër , mësohet se Balla ka kërkuar nga deputet socialist që të votojnë në seancën plenare të djeshme pro marrëveshjes së 5 qershorit dhe në 30 korrik pro ndryshimeve kushtetuese për hapjen e listave dhe heqjen e koalicioneve parazgjedhore. /Rigels Seliman
