Aktori i famshëm Johny Depp, u paraqit sot në Gjykatën amerikane të Qarkut Fairfax, ku dëshmoi në gjyqin e hapur prej tij pasi e shoqja e kishte akuzuar publikisht për dhunë seksuale dhe fizike para dhe gjatë martesës së tyre jetëshkurtër, raporton noa.al duke cituar agjencinë e lajmeve AP.
Depp kërkon nga ish gruaja Amber Heard, dëmshpërblim për prishje të imazhit të tij, në shumën e 50 milionë dollarëve amerikanë.
Por ndërsa Depp akuzon ish gruan, kjo e fundit ka denoncuar disa herë se është dhunuar prej ish burrit.
Heard ka thënë se hera e parë që u sulmua ishte kur Depp e goditi me shuplakë në vitin 2013, incident që ndodhi pasi ajo u tall me një tatuazh që ai kishte në trup.
Tatuazhi me mbishkrimin “Wino-na Forever” ishte bërë kur Depp ishte në lidhje me aktoren Winona Ryder. Kur u ndanë, Depp e ndryshoi tekstin në “Wino Forever”.
Duke marrë me radhë akuzat e ish gruas, Depp mohon ta ketë goditur: “Kjo nuk ndodhi,” tha ai për sulmin e supozuar.
Incident tjetër ndodhi një vit më pas, gjatë një fluturimi me avion privat në vitin 2014 nga Bostoni në Los Angeles kur po xhironte filmin “Black Mass”. Heard ka thënë se Depp u deh dhe e sulmoi atë gjatë udhëtimit, brenda në avion.
Por Depp dha një tjetër version të asaj që kishte ndodhur. Ai tha se piu pilula gjumi dhe shkoi e u mbyll në banjën e avionit duke fjetur aty, pikërisht për të shmangur sherret me të shoqen.
Një tjetër konflikt ndodhi në mars 2015, pak pasi ishin martuar. Johnny Depp tregoi me detaje në sallën e gjyqit sherrin që pati me Amber Heard, kur edhe iu pre gishti në sherr e sipër.
Gjithçka ndodhi në Australi ku 58-vjeçari, ndodhej për xhirimin e filmit “Piratët e Karaibeve”. Sherri lindi pasi e shoqja me të cilën ishte ndarë, u acarua për faktin se ai kishte takuar avokatët për një marrëveshje pasmartesore.
“Doja ta qetësoja dhe t’i thoja se nuk ia kisha me të keq. Nuk u qetësua dhe situata u përshkallëzua në skena të çmendura, kaos dhe dhunë. Ishte si e pushtuar. Doja të shmangia sherrin, por ajo vazhdonte të më ofendonte rëndë. Arrita deri aty sa të kyçe në 9 dhoma të ndryshme, por ajo u sulej me radhë duke u rënë me grushte, thjeshtë sepse donte sherr.
Atje ndodhi dhe prerja e gishtit: “Një moment, kur ishte larguar nga dera e dhomës ku ndodhesha, dola dhe shkova te bari. Mora një shishe vodka dhe piva disa gota, hera e parë që pija alkool pas shumë vitesh. Kur më pa, nisi të më bërtiste pse nisa të pija prapë. Kapi shishen e vodkës dhe ma hodhi. Më kaloi shumë pranë kokës. Unë qëndrova i qetë dhe mbusha një gotë tjetër nga një shishe tjetër.
E mori edhe atë shishe dhe e hodhi dhe atë drejt meje. U struka pas barit, por shishja më kapi në dorë. Në fillim nuk ndjeva fare dhembje, por si nxehtësi. Kur pashë dorën, maja e gishtit më kishte ikur dhe po shikoja vetëm kockën. Aty e humba fare dhe mbaj mend që shkruaja me gjakun e gishtit nëpër mure të gjitha gënjeshtrat që ajo më kishte thënë”, rrëfeu Depp në sallën e gjyqit.
Aktori me karrierë mëse 30 vjeçare në kinematografi, tha se shpesh përballej me dhunë nga e shoqja e cila e godiste herë me shuplaka e herë e shtynte me përçmim, madje i hidhte dhe sende të ndryshme si telekomandë apo një gotë vere fytyrës.
“Kishte raste kur shkoja dhe mbyllesha në banjë ose në një vend ku ajo nuk mund të futej,” tha Depp.
Një vit pas dasmës, ata u ndanë dhe martesa mori fund më 2016.
Por ajo kohë krijoi shqetësim tek ai. Depp tha se përdorte drogë dhe pinte alkool si një mënyrë për të përballuar abuzimin e Heard dhe tha se ajo ishte gjithashtu një pijanece e madhe.
Depp e paditi Heardin pasi ajo shkroi një artikull op-ed më 2018 në The Washington Post në të cilin ajo e quajti veten një “figurë publike që përfaqëson abuzimin në familje”.
Depp tha se akuzat dhe artikulli kontribuan në rrënimin e reputacionit të tij në mënyrë të padrejtë duke arritur deri aty sa të humbte edhe ekskluzivitetin fitimprurës të filmit “Pirates of the Caribbean”.
/noa.al
