Reforma në drejtësi pritet që të ngrejë siparin e bashkëpunimit mes Partisë Socialiste dhe Partisë Demokratike. Muajt e fundit është folur gjatë për një frymë të re në raportet qeveri-opozitë dhe testi për këtë do të jetë në vjeshtën e këtij viti.
Gjysma e anëtarëve në KPK dhe KLGJ do të largohen për shkak të mbarimit të mandatit dhe emrat e rinj duhet të zgjidhen nga Parlamenti. Një tjetër element që kërkon bashkëpunim është edhe vetingu në drejtësi.
Vitin që vjen mbarojnë mandatet e anëtarëve të KPK dhe KPA, por duke qenë se vetingu nuk ka përfunduar duhet të zgjatet mandati i tyre gjë që kërkon sërish konsensus. Edhe kryetari i Këshillit të Lartë të Prokurorisë, Gent Ibrahimi gjatë takimit për projektin
“Drejt një eficence dhe integriteti më të mirë të KLGJ dhe KLP”, deklaroi se në fund të këtij viti anëtarët do të rinovohen në 50% të përbërjes së tyre. Lidhur me një nga gjetjet e raportit të Komitetit Shqiptar të Helsinkit, për caktimin në detyrë të drejtueseve të prokurorive, pa kaluar vettingun, kryetari i KLP u shpreh se ligji nuk parashikon pezullimin e sistemit të karrierës, gjatë procesit të vetingut.
“Në fund të këtij viti këshillat do të rinovohen në 50% të përbërjes së tyre dhe është një mundësi e mirë për shoqërinë civile. Padyshim që asnjë organizatë e shoqërisë civile nuk di aq shumë dhe aq thellë sa ç’dinë ata që e administrojnë sistemin, por ju keni fuqinë e përfaqësimit publik, ndaj është e rëndësishme të sillni frymën tuaj në monitorimin e sistemit.
Ne nuk mendojmë se pezullimi i sistemit të karrierës në prokurori është një zgjidhje. Për ne s’ka qenë kurrë një opsion pavarësisht vështirësisë që krijon vetingu”, tha Ibrahimi.
Reagon Balla
Ndërkohë ka reaguar edhe kreu i Grupit Parlamentar të Partisë Socialiste, Taulant Balla. Ai u shpreh se e vetmja zgjidhje për të zgjatur mandatin për anëtarët e KPK është ndryshimi në Kushtetutë. Balla tha se për këtë çështje duhet bashkëpunuar me opozitën në shtator për të gjetur gjuhën e përbashkët.
Sipas tij kjo procedurë kërkon prioritet nga legjislatura e re parlamentare. “Unë e kam thënë që e vetmja zgjidhje është një zgjatje përmes një dispozite kalimtare në Kushtetutë të mandatit të Komisionit të Përkohshëm të Kualifikimit.
Kohë në dispozicion ka, sepse në fund të fundit, unë besoj se për këtë çështje me opozitën e re parlamentarë në shtator e tutje ne mund të mund të gjejmë gjuhën e përbashkët për të zgjatur mandatin e tyre, por duhet të kuptoni se ndryshimet në Kushtetutë kërkojnë një kohë të gjatë në dispozicion, të paktën 45 ditë, kështu në këtë këndvështrim do të sugjeroja që kjo të jetë një çështje që të adresohet me prioritet nga legjislatura e re parlamentare”, tha ai.
