Ambasadori italian në Tiranë, Fabrizio Bucci, ka reaguar pas një shkrimi të botuar në gazetën TemA, ku përmendet Pier Ferdinando Casini, emri i të cilit ka dalë në përgjimet e Ndraghetas, për të cilat po bëhet kaq shumë zhurmë në Itali.
Gazeta TemA në shkrim e vet në thonjëza thotë se “mafiozi” Casini është pritur në zyrë nga Lulzim Basha dhe është dekoruar edhe nga Ilir Meta.
Sa për sqarim, gazeta nuk e ka etiketuar si mafioz Casinin, pasi në të kundërt nuk do të ishte nevoja për përdorimin e thonjëzave.
Casini thjesht është marrë si shembull, për të treguar se akuzat e opozitës për lidhjet e Ndraghetës me politikën në Shqipëri janë qesharake, pasi ata kanë pritur vetë një prej të përfolurve në përgjime, madje dhe e kanë nderuar, dhe për këtë arsye edhe fjala mafioz është futur në thonjëza, për të treguar se bëhet fjalë për një akuzë qesharake dhe të pavërtetë.
Reagimi i plotë i ambasadorit italian:
Zoti drejtor,
në faqen ëeb që Ju drejtoni është botuar sot një shkrim i shkurtër në të cilin është përdorur një fjalë denigruese dhe fyese, edhe pse në thonjëza, referuar kryetarit Pier Ferdinando Casini, senator i Republikës italiane.
Kryetari Casini është një figurë e lartë insitucionale italiane që, gjatë karrierës së tij të pasur në nivel kombëtar e ndërkombëtar (ndër funksionet e ndryshme që ka mbajtur përmendim atë të ish- kryetarit të Dhomës së Deputetëve dhe të Komisionit për Çështjet me Jashtë në Senat, europarlamentarit, presidentit të Internacionales Demokratike të Qendrës, kryetarit të Unionit Ndërparlamentar, profesorit universitar) i ka shërbyer gjithmonë Republikës italiane me respektin maksimal ndaj shtetit dhe institucioneve.
Polemika politike është kripa e demokracisë dhe unë, si ambasador i Italisë në këtë vend, nuk mund veçse ta vlerësoj si zhvillim pozitiv të një rrugëtimi drejt konsolidimit të institucioneve dhe të shoqërisë shqiptare.
Një rrugëtim që Italia e ka mbështetur gjithmonë që prej rënies së regjimit komunist. Por përballja politike shqiptare – edhe pse me tone të larta – nuk mund e nuk duhet absolutisht të arrijë deri në atë pikë sa të hedhë qoftë edhe dyshimin më të vogël mbi integritetin e një përfaqësuesi të lartë të institucioneve italiane sikurse kryetari Casini.
Këtë nuk mund ta toleroj tani dhe as nuk do ta toleroj në të ardhmen.
Liria e shtypit është e shenjtë dhe Italia e ka mbrojtur dhe do ta mbrojë gjithmonë. Por kjo liri nuk mund të arrijë deri në sulme personale të pabaza, për më tepër për të goditur të tjerë.
Për fat të keq shkrimi i botuar në të përditshmen tuaj bën pikërisht këtë, me një qasje që, më shumë se sa e guximshme, është një fyerje për të gjithë italianët.
Për të gjitha këto arsye dëshiroj t’ju shpreh indinjatën time të thellë, gjithë keqardhjen dhe tronditjen time, si ambasador dhe si shtetas italian, për shkrimin e publikuar në gazetën tuaj ndaj kryetarit Casini si dhe për dëmin që i është shkaktuar imazhit të Italisë.
Do t’ju isha mirënjohës nëse do ta botonit të plotë këtë letër timen në vijim të shkrimit në fjalë.
