Reforma në drejtësi ka hyrë në shina, por ende nuk po shihen hetime apo ndëshkime politikanësh. Sytë e qytetarëve ishin te SPAK dhe zhgënjimi po duket, pasi të gjithë duan hetime për politikanët.
Kjo ka sjellë dje dhe një debat mes kryeministrit Edi Rama dhe disa ndjekësve të tij në rrjetet sociale. Qytetarët kanë kërkuar që të ketë arrestime politikanësh. “Kryeministër kam respekt për punën që bën, por duhet të punojë gjykata për ata hajdutët në Parlament që kanë pasuri të padeklaruar t’i fusje brenda një nga një boll vodhën hajdutët. Kam 30 vjet në emigrim dhe s’kam një shtëpi”, shkruan qytetari.
Por ndaj tij ka komentuar kryeministri, i cili është distancuar nga hapja e hetimeve, ndërsa ia ka kaluar topin drejtësisë. “Nuk jemi në vitin 1945 i dashur dhe nuk të fut brenda as partia, as qeveria, po drejtësia dhe prandaj po e pastrojmë edhe drejtësinë njësoj siç kemi pastruar kanalet e bllokuar me plehra fushave! Por duhet durim, se kanalet pastrohen më lehtë e më shpejt se sa drejtësia”, shkruan Rama.
Hapja e dosjeve të bujshme
Pra duket qartë se pritshmëria për të shkuar te hetimi i politikës është shumë e madhe. Kur nisi reforma në drejtësi u tha shpesh se do të hapen dosjet e vjetra, 21 Janari, Gërdeci, Rruga e Kombit, shitja e detit dhe afera të tjera që kanë shkaktuar viktima dhe miliona euro dëme financiare. Deri më sot nuk ka asnjë lëvizje edhe pse ka disa rrugë që mund të ndiqen për të shkuar te dosjet e vjetra.
Pyetja që lind është: Cilat janë ato? E para është dorëzimi i provave të reja. Bëhet fjalë për çështje apo individë për të cilët nuk ka një vendim gjyqësor të formës së prerë. Nëse marrim 21 Janarin, nëse dikush dorëzon prova të reja për individë të tjerë atëherë sigurisht që hetimi është i mundshëm.
Rruga e dytë është përmes kallëzimeve të reja. Pra nëse qeveria, një jurist apo një qytetar bën një padi për një ngjarje që nuk është zbardhur këto vite, atëherë prokuroria apo SPAK mund të vihen në lëvizje. Një tjetër rrugë është ajo e hetimeve kryesisht. SPAK ka të drejtë të nisë hetimet vetë për çështje të caktuar, sidomos kur ka ndjeshmëri publike. Rruga e katërt është përmes një ligji të posaçëm. Pra nëse Parlamenti harton një ligj që të rihapen të gjitha dosjet e vjetra, kjo do lehtësonte punë e të gjithëve. Sipas burimeve, në SPAK ka pasur një padi për tragjedinë e Gërdecit.
Një prej familjarëve të viktimave i është drejtuar prokurorisë së posaçme me një padi të re dhe nuk është çudi që të kemi zhvillime. Kur në krye të prokurorisë ishte Arta Marku, ajo deklaroi se për 21 Janarin po shihet mundësia e rihapjes së dosjes. Ndërkohë për shumë krime të tjera të bujshme kemi një padi që është marrë në dorë nga SPAK. Izet Haxhia ka bërë një kallëzim ndaj ish-kryeministrit Berisha për të gjitha ngjarjet më të bujshme që kanë ndodhur në vend, duke futur firmat piramidale, vrasjen e Hajdarit, grushtin e shtetit 1998, etj. Pra mundësitë ekzistojnë dhe tashmë topi është në krahun e drejtësisë. Kreu i SPAK Arben Kraja ka deklaruar se viti 2021 do të jetë i rëndësishëm në luftën ndaj korrupsionit. Mbetet të shihet nëse do të kemi rezultate të rëndësishme.
