Kryeministri Edi Rama ka sulmuar dje një për një kandidatët e Partisë Demokratike. Nga takimi teksa prezantoi kandidatët e PS Rama nuk la pa sulmuar edhe kreun e PD Lulzim Basha dhe presidentin Ilir Meta.
Teksa ironizoi përfaqësuesit e koalicionit opozitar ai u shpreh se nuk mund t’i besojnë shqiptarët votën e tyre këtyre figurave që PD ka vendosur në lista për zgjedhjet e 25 prillit. Sipas tij, vendi nuk ka parë kurrë në historinë e tij atë që ai e cilësoi si tabor krushqish. “Kush mund ta dërgojë vendin përpara përveç nesh? Kush nga shqiptarët ka lënë mendjen, veshët me fajde te Monika apo pa gale të Iliri dhe Saliu, mund të mos e shikojë ndryshimin e madh?
Kanë nxjerrë përpara një dhëndër dhe janë nisur për dasmë, me kalastrenat e Gon Dukës, me kapsollat e Fatmir Mediut, me faqoren e Dash Shehit, me kecat e Tym Idrizit, me vetullat e Vangjel Dules, me preshtë e Tritanit, me peshqirët e Mziut, simiten e Xhaferrit të Durrësit me rakinë e Leskos me gërnetën e Mesilës. Shqipëria kurrë në historinë e saj që nga 1912 nuk e kanë parë këtë tabor krushqish. Kam vërtet frikë se do të çojnë nga varri Çeço Musarajin dhe të hedhë në gjyq Lulzim Bashën, për të drejtën e autorit”, tha ai.
Kryeministri Rama deklaroi se Partia Demokratike po kërkon të rikthehet në qeveri me të njëjtat fytyra. Ai i cilësoi kundërshtarët si të çekuilibruar, ndërsa kreun PD e cilësoi si një person i cili sipas tij është në gjumë. Rama u shpreh se në këtë ndeshje ata janë të humbur. “Problemi ynë më i madh janë kundërshtarët e çekuilibruar, që kanë bërë gjithçka për ta humbur ndeshjen, program pa lidhje, një ekip si një parking makinash të vjetra anash autostradës. Luli si roje parkingu që fle gjumë, Monika që iu bie borive të çmontuara për të ndaluar autokolonën tonë drejt fitores.
Duhet ta mbrojmë vendin nga rifillimi i avazeve të vjetra të atyre që duan të rikthehen në qeveri me të njëjtat fytyra, por më të rrudhura e më të lodhura. Të atyre që kërkojnë mandatin e pestë për të mbrojtur veten nga dora e drejtësisë”, tha Rama
Rama sulmon Metën
Pasi sulmoi kandidatët e PD, kryeministri Edi Rama nuk la pa sulmuar edhe presidentin Ilir Meta. Ai u shpreh se presidenti Ilir Meta është ai i cili do që të ndalojë drejtësinë e re në vend. Sipas kryeministrit, presidenti është futur në fushatë vetëm për të penguar reformën në drejtësi.
“Me kë fiton drejtësia, Meta apo Gjonaj? Do të më thoni nuk kandidon për deputet, ky është kryedeputeti i asaj skuadre, etja e vazhdueshme e çon në gulçime të vazhdueshme për të ndalur drejtësinë e re. Parafytyroni sikur me 25 prill të mos zgjidhjet kjo po ky. Po në Durrës kush fiton Paloka apo Ekonomi? Me kë fiton arsimi me Evisin apo filxhanin Monika Kryemadhi? Me kë fiton Tirana”, tha Rama. Sakaq, Rama vijoi më tej duke krahasuar kandidatët e PS në zgjedhjet e 25 prillit me ata të PD.
Ai ngriti pyetjen se kush mund të jetë kandidati fitues për disa nga qytetet e vendit si Tirana, Berati e Kavaja. “Me kë fiton Tirana? Majko dhe Mesila, më kë fiton? Balluku apo Dash Shehu? Një pensionist dhe një pensioniste, një mjek dhe një mjeke, zgjidhet ky për mos të zgjedhur këto? Me këtë fiton Tirana? (Nxjerr foton e Berishës) Ministrja jonë e shëndetësisë dhe e tyre (Foto nga Manastirliu dhe Petrit Vasili).
Më ishte përgjigjur Vangjeli për disa fjalë që kisha thënë për të, atyre fjalëve nuk i heq asnjë presje. Po Berati me kë fiton? Këtë e njihni është Ludoviku, që gëlltiti një lugë çorbë dhe ngeli tërë jetën debatikas. Po këtu në Kavajë kush fiton”, tha ndër të tjera, Rama.
