Kryeministri Edi Rama ka premtuar se dozat e para të vaksinës anticovid do të mbërrijnë në fillim të 2021.
Në ditën e Krishtlindjes, kryeministri Rama vendosi t’iu dhurojë lule mjekëve dhe infermierëve që punojnë në spitalin Covid 1, duke iu dhënë premtimin se ata do të vaksinohen të parët.
“Shumë respekt për të gjithë. Ja që ndodhi ajo që ndodh një herë në 100 vite. Është mbi shpatullat tuaja. Dhe do të ngelet e shënuar në jetën tuaj profesionale. Jam shumë krenarë për ju.
Unë jam shumë i kujdesshëm në fjalët, por jemi shumë afër përmbylljes së një marrëveshjeje me disa komponentë për vaksinën kështu që shpresoj se në fillim të vitit do të kemi edhe dozat e para, që sigurisht janë për ju.
Do të vaksinoheni shumë shpejt, çështje javësh”, tha kreu i qeverisë. Kryeministri u shpreh se qeveria shqiptare është duke bërë çdo përpjekje për të siguruar dozat e zakonshme të vaksinës, megjithatë sipas tij është shumë e vështirë të negociohet.
Rama tha se derisa të mbërrijë vaksina në Shqipëri, qeveria është duke punuar për përgatitjen e ambientit se ku do të bëhen vaksinimet. Ndërkaq, shefi i qeverise lajmëroi se së shpejti spitali Infektiv do të shembet, për t’u ndërtuar nga fillimi pasi janë siguruar fondet. “SHBA ka vendosur ndalimin e eksportit të çdo doze. Për fillimin është problem.
Unë kam folur me disa kryeministra dhe nuk i thonë shifrat se janë shumë më pak se ç’kishin premtuar ata. Ne jemi në komunikim me disa nga shtetet. Dhe pavarësisht marrëveshjes me Pfizer, jemi shumë afër edhe me Astra Zeneca. Kemi shumë besim se ekipet e spitaleve COVID do të jenë të parët që vaksinohen do të jeni shumë shpejt.
Në stadiumin “Air Albania” do të vendosen të gjithë ekipet e vaksinimit sepse në mjediset e hapura është më mirë edhe për të shmangur radhët. Po bëjmë një projekt shumë të bukur që do të jetë gati në javën e parë të janarit. T’ju imunizojmë juve një herë dhe pastaj hap pas hapi me të gjithë mjekët, mësuesit, punonjësit e policisë dhe pastaj me të tjerët”, tha Rama.
Mutacioni i ri
Andi Koraqi, Shef i Laboratorit të Mikrobiologjisë, QSUT shpjegoi se ky mutacion nuk pritej nga ekspertët në të gjithë botën. Pas ndryshimeve, virusi sars covid 2 është vërejtur të ketë një transmetueshmëri më të madhe, por ende nuk ka të dhëna që vërtetojnë se ai mund të jetë më i rrezikshëm sesa virusi i parë.
“Mutacioni ka dale jashtë parashikimeve. Është ndryshim i madh i pashpjegueshëm. Nuk dihet ende si ka ardhur, ndërkohë që nuk dimë ende pasojat që lë në organizëm. Ndryshimi mes atij klasik dhe virusit të ri është se lidhet me 27 nukleotide. Disa shkencëtarë thonë se transmetueshmëria është rreth 70%, nuk dihet ende impakti që ka.
Por ajo që dihet është se po zëvendëson me shpejtësi virusin klasik”, tha Koraqi në një televizion. Ky variant i ri i COVID-19 u zbulua për herë të parë në Britaninë e Madhe dhe po qarkullon në Europë, ndërsa nuk dihet ende nëse ka mbërritur në Shqipëri. Momentalisht janë disa kompani si Pfizer dhe ajo Biontek të cilat janë duke bërë testime e analiza për të saktësuar ndikimin e vaksinës së prodhuar tek ky mutacion, por edhe tek forma të tjera të virusit që janë shfaqur në botë.
