Vendimi për të shkuar tek hapja e listave dhe heqja e koalicioneve rrezikon të përplasë fort Partinë Socialiste me ndërkombëtarët. Dje Kuvendi i Shqipërisë u mblodh në seancë plenare, ndërsa tema më e nxehtë ishte marrëveshja e 5 qershorit, draft i cili u votua me 99 vota, pavarësisht rezervave që kishin për të deputetët e mazhorancës dhe opozitës.
Por vëmendjen më të madhe dje e mori deklarata e kryeministrit Edi Rama, i cili nga foltorja e Kuvendit u kujdes që të dërgonte mesazh të qartë tek ndërkombëtarët, të cilëve iu kërkoi që të qëndrojnë larg hapjes së listave. Rama u shpreh prerë, se për listat vendosin shqiptarët e jo të huajt, ndërsa iu kujtoi partnerëve se Shqipëria nuk i është shmangur detyrimeve edhe në aleancat ndërkombëtare ku ka marrë pjesë.
Madje, shefi i qeverisë i ra edhe foltores me grusht për të përforcuar deklaratën e tij, ndërkohë që shtoi se nuk do të ketë më pakt në anglisht, duke iu referuar kështu atij të 5 qershorit të firmosur mes PS, PD dhe LSI në rezidencën e ambasadores së SHBA në Tiranë.
“Kam dëgjuar se KP-në e paska krijuar një aleancë globale e SHBA, BE, OSBE dhe nuk e di kush tjetër. Jo, KP e krijoi vullneti i PS që është sot shumicë qeverisëse, që ka detyrë të shohë përtej kësaj salle dhe përtej retorikës dhe debatit politik, edhe atë që e quajmë opozitë rrugore, t’i referohemi ndonjëherë. SHBA dhe BE kanë dhënë kontribut në këtë proces, sepse PD që kërkon të udhëheqë akoma nuk di të flasë shqip. Jemi palë tjetër, por merremi vesh shqip. Nuk e pranoj dot pse në vitin 2020 duhet të flasim anglisht.
Ia kam kërkuar që në 2017-ën Lulzim Bashës, jo me anglisht. Nuk na respektojnë miqtë dhe partnerët nëse iu japim bujarisht detyra që janë detyrat tona. Siç e thashë edhe më parë. Kur ne kemi vetëdijen që po bëjmë gjënë e duhur, jemi gati që mosdakortësitë t’i diskutojmë, pa u tërhequr, nëse nuk na bindin. Pa u tërhequr, ndaj jemi miq, ndaj jemi partnerë”, deklaroi ai. Kjo tregon pra se ndryshimet kushtetues mund të sjellin krisjen e madhe mes PS dhe ndërkombëtarëve.
Ndërkombëtarët të qëndrojnë larg hapjes së listave
Por kryeministri Edi Rama i dërgoi edhe një mesazh të qartë ndërkombëtarëve e sidomos ambasadorëve, duke iu treguar vendin, ndërsa është shprehur i qartë dhe i prerë se për hapjen e listave nuk vendosin të huajt por vetë shqiptarët dhe sipas tij, Parlamenti do i miratojë në datë 30 korrik, pasi e do shumica e popullit. “S’jemi shërbëtorë të askujt, por jemi të vetëdijshëm, që s’jemi as SHBA, as BE, as ndonjë superfuqi bërthamore, as mini superfuqi energjetike.
Jemi këtu ku jemi falë miqve dhe partnerëve tanë. Nuk i vëmë ndonjëherë në dyshim detyrimet tona në aleancat ndërkombëtare, s’vëmë ndonjëherë në diskutim detyrat tona këtu për të mos liruar asnjë fije me prioritetet që janë tonat, ama kur vjen puna për të vendosur nëse do hapim lista s’do hapim lista, këtë e vendosim ne. Këtë e vendosim ne, dhe s’kemi asnjë problem që ta diskutojmë dhe t’jua themi. Besoj se do vazhdojmë ta themi, megjithëse jo për një kohë të gjatë, sepse ky kuvend ka marrë vendim të hapë listat më 30 korrik”, u shpreh ai.
Pakti i 5 qershorit, Rama falënderon opozitën e re
Megjithatë, kryeministri Edi Rama u kujdes që të rezervonte edhe një falënderim për opozitën parlamentare dhe deputetët e saj, të cilët sipas tij do të votonin për marrëveshjen e arritur mes PS, PD dhe LSI mbrëmjen e 5 qershorit. Në fjalën e tij Rama theksoi se do ta votonte marrëveshjen e 5 qershorit, jo me zemër, por me mendje pasi e di se çfarë vlerë ka ky pakt. “Do të japim një mesazh të qartë.
Falenderim për opozitën parlamentare, për zonjën Hajdari që bashkëpunoi për firmosjen e marrëveshjes. T’ju japim një mundësi të gjithëve në zgjedhjet e ardhshme, duke pranuar një administrim zgjedhor ku PD dhe aleatët nuk janë të përjashtuar, por janë të barabartë me shumicën qeverisëse. Nuk është sekret dhe e kam thënë sa e sa herë, që unë personalisht nuk e votoj me zemër, por me mendje marrëveshjen e 5 qershorit. E votoj me mendje, jo për ata që ikën nga Kuvendi, por për votuesit e tyre”, nënvizoi Rama.
