Kryeministri Edi Rama është treguar i gatshëm për bashkëpunim me PD për ndryshimet kushtetuese. Nga konferenca për shtyp me ambasadorin e Bashkimit Europian në vendin tonë Luigi Soreca, Rama tha se është i hapur për të diskutuar me opozitën për tre amendamentet që synojnë ndryshimet e kushtetuese, që kanë të bëjnë me vetingun e politikanëve, reformën territoriale dhe reformën zgjedhore.
Rama u shpreh se një reformë e thellë kushtetuese do të ndryshonte sipas tij edhe arkitekturën konstitucionale të shtetit. “Së pari, Kushtetuta siç është, nuk ka asnjë problem që të mund të justifikojë problemet që krijohen nga mosrespektimi i saj.
Së dyti, vetëm Biblën dhe Kuranin nuk mund ta ndryshojmë, çdo gjë tjetër mund të ndryshojë, përfshirë dhe Kushtetutën, sepse nuk është e shkruar në gurë. Së treti, një reformë e thellë kushtetuese, që do ndryshonte të gjithë arkitekturën konstitucionale të shtetit, mund të ketë vend për diskutim, por është ndërmarrje që kërkon angazhim të një natyre tjetër dhe sigurisht kërkon shumë kohë.
Unë, në parim, jam gjithmonë për ndryshimin dhe them se gjithmonë ka mundësi për të bërë ndryshim dhe se asgjë nuk është e pandryshueshme. Nevoja për ndryshim dhe dyshimi mbi çfarë ke rreth e rrotull apo çfarë ka në një moment të caktuar si arritje, janë shtysa për të shkuar përpara. Çdo gjë mund të diskutohet dhe çdo gjë do ta diskutojmë, duhet të mësohemi të diskutojmë”, tha ai. Ndër të tjera, Rama i ka kërkuar Bashës që të kenë bisedime pa ndërmjetësimin e ndërkombëtarëve. Ai theksoi, se dialogu mund të bëhet mes kryeministrit dhe opozitës.
“Do ta përsëris edhe në sy të ambasadorit publikisht se e kam thënë disa herë, në këtë vend të paktën sa të jem unë këtu, dialog mes qeverisë dhe opozitës në anglisht nuk do bëhet më. Nuk kemi asnjë arsye që t’i vëmë në pozitë edhe miqtë tanë edhe partnerët tanë, hajdeni këtu, futuni në mes, shko tek ai, hajde këtu, na mblidhni tek ai, futuni atje. Ne nuk kemi pse flasim anglisht me njëri-tjetrin, ne kemi gjuhën shqipe, këta i kanë përkthyesit, janë të pazëvendësueshëm në të gjithë procesin tonë të rritjes dhe të konsolidimit sepse thashë, kanë në radhë të parë interesin e tyre strategjik e kanë këta, edhe BE edhe SHBA për ta pasur Shqipërinë të integruar plotësisht, në të gjitha strukturat e tyre”, tha ai.
Soreca: Duhet të ketë dialog mes palëve
Ndërkohë, ambasadori i Bashkimit Europian Luigi Soreca ka inkurajuar dialogun mes palëve politike në vend, sa u përket tre propozimeve të PD-së për ndryshime kushtetuese. Ai u shpreh, se palët duhet të ulen dhe të diskutojnë. Ambasadori Luigi Soreca, vijoi më tej duke thënë se nëse do të duhet ndihmë do të shihet nëse kjo gjë do të jetë e mundur. “Kemi vijuar të përmendim dialogun dhe konsensusin politik. Kuvendi është foltorja ku bëhen diskutimet, dialogu dhe negociatat duhet të ndodhin. Ne inkurajomë të dyja palët të ulen në tryezë e të diskutojnë temat që janë për diskutim. Nëse do të na kërkohet për asistencë do të shohim nëse kjo gjë është e mundshme dhe do ndihmojmë në spektrin politik siç kemi bërë gjithmonë”, tha Soreca.
