Rikthimi i Fatos Nanos në Shqipëri është gjithmonë lajm. Sidomos pastaj kur flet për politikën dhe zhvillimet në vend. Ndaj intervista e djeshme e tij, pas një kohe të gjatë heshtje, natyrisht që ka pasur një interes maksimal.
Por, ndryshe nga herët e tjera, shumica e mediave në vend, e kanë censuruar pjesën kryesore të intervistës së tij, ose ka pasur edhe nga ato që nuk e kanë përmendur fare.
Pjesa e censuruar është kur Fatos Nano flet për Sali Berishën e Ilir Metën, dy personazhe që i njeh mirë, pasi të parin e ka pasur një kundërshtar të egër për vite me radhë, ndërsa të dytin e promovoi vetë si politikan, edhe pse më pas iu kthye kundër, për ta rrëzuar nga pushteti dhe për t’u bërë me Berishën.
Censura nga portalet që financohen nga Berisha-Meta është e kuptueshme, pasi dje Nano i masakroi ata dhe i nxorri lakuriq, si dy politikanë të korruptuar dhe kriminelë (kuptohet, jo se Nano është ndonjë burrë më i mirë), por ajo që të bën përshtypje, është fakti që Nano u censurua dhe nga ato që media që e konsiderojnë veten si të “pavarura” dhe më të “mëdhatë” në vend, në pjesën kur fliste për Berishën dhe Metën.
Gjë që në fakt konfirmon atë që dihet prej kohësh se, ndryshe nga sa thuhet, që mediat kryesorë në vend janë kapur nga Rama, në fakt komandohen nga Berisha e Meta, të cilëve s’guxojnë t’iu përmendin as emrin, kur i akuzon dikush, qoftë ky edhe Fatos Nano.
Ndaj dhe dje u morën me historitë e Nanos në burg, në kooperativë, apo dhe kur e sulmuan në Kryeministri, por thelbin e intervistës, në të cilën ai akuzonte rëndë Berishën e Metën, e fshehën.
Madje më shumë ka pasur lajme të Monika Kryemadhit, e cila del çdo darkë në TV, se sa për Fatos Nanon, i cili del e flet njëherë në 10 vjet./ Gazeta “Tema”
