Partia Socialiste ka shtuar presionin ndaj Gjykatës Kushtetuese sa i takon zgjedhjeve vendore. Pak ditë më parë Komisioni i Venecias la në fuqi zgjedhjet e mbajtura duke rrëzuar kështu pretendimet e Voltana Ademit në Gjykatë Kushtetuese për shpalljen e 30 qershorit si antikushtetues megjithatë është në tagër të Kushtetueses për të vendosur.
Ditën e djeshme Partia Socialiste mblodhi kryesinë ku ishte Sekretari i Përgjithshëm Damian Gjiknuri ai i cili deklaroi se socialistët janë të gatshëm për zgjedhje të pjesshme vendore. Ai u shpreh se pas zbardhjes së vendimit të Komisionit të Venecias, presidenti Ilir Meta brenda 45 ditëve duhet t’i dekretojë ato. Sipas Gjiknurit, Partia Socialiste është produkt i reflektimit të interesave politike të shumicës shqiptare që kanë votuar prandaj ajo është fokusi kryesor.
“Ne jemi gati edhe për zgjedhje të pjesshme vendore, nëse Presidenti pas vendimit të Gjykatës Kushtetuese do t’i dekretojë ato. Kjo është një çështje pas zbardhjes së vendimit të Gjykatës Kushtetuese. Mendoj se Gjykata Kushtetuese nuk ka pse ta vonojë më, pasi opinioni i Venecias ishte shumë i qartë.
Do të thotë që brenda 45 ditëve, siç e ka Kushtetuta, ai duhet të dekretojë zgjedhjet. PS ka qenë partia që fitoi zgjedhjet, konkurron si parti dhe çdo gjë, edhe qeverisja është produkt i reflektimit të interesave politike të shumicës shqiptare që kanë votuar këtë parti. Kështu që partia është fokusi kryesor dhe partia është ajo që konkurron në zgjedhje në çdo kohë që ato të jenë”, tha ai. Gjiknuri po ashtu u ndal edhe te reforma zgjedhore që PD ka propozuar ku deklaroi se PS është e gatshme të ulet në tryezë dhe të bjerë në konsensus sa i përket rekomandimeve nga OSBE/ODIHR.
“Ne e kemi thënë vazhdimisht, që për çështje të cilat, ka një traditë parlamentare PS dhe PD dhe të tjerë duhet të jenë pjesë e një komisioni të reformës zgjedhore. Ne presim që do të ulemi në atë tryezë. Jam i bindur që edhe PD do të ketë propozimet e saj. Edhe ne kemi propozimet tona. Gjithmonë bazuar në rekomandimet që ka dhënë OSBE-ODIHR në raport. Dhe natyrshëm për çështje të tjera të përbashkëta që mund të krijojmë konsensus”, tha Gjiknuri.
Bashkitë ku ka vakanca
Ndërkohë në 6 nga 61 bashki, aktualisht drejtohen nga kryetarë të emëruar dhe jo të dalë nga zgjedhjet vendore. Në këtë kategori bëjnë pjesë Shkodra, Durrësi, Vora, Rrogozhina, Dibra dhe Lushnja. Në Shkodër, kryebashkiakja Voltana Ademi edhe pse nuk kandidoi në zgjedhje është duke mbyllur mandatin e dytë në krye të kësaj bashkie. Në Durrës, Valbona Sako dha dorëheqjen dhe u zëvendësuar në detyrë nga Emirjana Sako.
Po ashtu edhe Vora po drejtohet nga një kryetar i pazgjedhur me votë, pasi ish-kryebashkiaku Agim Kajmaku ndodhet në arrati dhe vazhdon të jetë në kërkim. Ndërkohë kryetari i Bashkisë Rrogozhinë, Haxhi Memolla u nda nga jeta dhe kjo solli një tjetër bashki që drejtohet nga kryetar i zgjedhur pa votë. Sa i përket Dibrës, kryebashkiaku Dionis Imeraj dha dorëheqjen për të kandiduar për deputet në zgjedhjet e 25 prillit. Ndërsa për lidhur me Bashkinë e Lushnjes, ish-kryebashkiaku Fatos Tushe u arrestua nga policia për shpërdorim detyre dhe falsifikim dokumentesh.
