Zbardhen detajet e vonesave me certifikatat e sigurisë për anëtarët e Këshillit të Emërimeve në Drejtësi. KED që prej korrikut ka nisur punën për të plotësuar 3 vakanca në Kushtetuese dhe ende nuk janë miratuar emrat final.
Puna është drejt fundit, por mbetet të shihet se kur do të kemi kandidatët e miratuar. Gazeta pak kohë më parë denoncoi disa herë se anëtarët nuk pajiseshin me certifikata sigurie dhe kjo po sillte vonesa në verifikimin e kandidatëve.
Por KED ka zbardhur procesverbalet e mbledhjeve të mbajtura në korrik e gusht, ku ka dalë në pah se ka pasur dhe vetë anëtarë që kanë zvarritur procedurat e aplikimit për certifikata sigurie.
“Në funksion të punës së KED, ka filluar kompletimi i dosjeve personale me qëllim pajisjen e anëtarëve, anëtarëve zëvendësues dhe të stafit mbështetës me certifikatën e sigurisë.
KED ju në dijeni për plotësimin kryesisht të dokumentacionit që plotësohet nga vetë aplikanti,
që është formulari. KED thekson se ajo nëse nuk dorëzohet ky formular nga aplikanti, KED nuk
mund të vijojë me plotësimin dhe depozitimin e dosjes pra me procedurën e marrjes së
certifikatës së sigurisë. Kemi pasur vonesa në këtë drejtim. E kuptoj shumë drejt që ju të gjithë
jeni shumë të ngarkuar, por do desha që t’i jepni prioritet plotësimit të formularit të sigurisë
sepse ne kemi të kushtëzuar me kohë, dhe e kuptoni vetë çka do të thotë pozicioni relator, e me
pas i pasjes ose jo të një certifikate sigurie në një rast kur do të na duhet të bëjmë me dokument
të klasifikuar”, ka thënë kryetari Ervin Pupe në mbledhjen e datës 05.07.2021.
Përzgjedhja e kandidatëve
KED gjatë dy javëve të fundit ka vijuar me procedurat për të bërë përzgjedhjen e emrave që plotësojnë kushtet. Fillimisht u kualifikua kandidati Ervin Karamuço, ndërsa më pas u bë kualifikimi i kandidatëve Albert Demirneli dhe Alket Jaupi, për vendin vakant të Z. Fatmir Hoxha.
Ndërkohë ditën e premte KED do të mblidhet dhe do të sh1yrtojë dosjen për kandidatin Sandër Beci ku do të bëhet dhe renditja finale e kandidatëve. Por mister mbetet se çfarë ka ndodhur me kandidatin Vatë Staka. Deri më tani KED nuk ka bërë asnjë njoftim për kandidaturën e tij, ndërkohë që nga njoftimi të premten do të shqyrtohet vetëm emri i Sandër Becit.
Zhbllokimi i ngërçit
Gazeta prej disa muajsh ka ngritur shqetësimin se pavarësisht punës së KED me kandidaturat, mund të krijohen ngërçe me emërimet. Gjykata e Lartë duhet të plotësojë 3 vakanca në Gjykatën Kushtetuese dhe pasi të bëjë renditjen KED të të gjithë emrave që kualifikohen do dërgojë listën.
Por që Gjykata e Lartë të bëjë votimin duhet që të ketë së paku gjysmën e anëtarëve të përcaktuar në ligj ose më saktë 10 të tillë. Sot kjo gjykatë ka vetëm 9 emra. “Kryetari i Gjykatës së Lartë thërret mbledhjen e posaçme të gjyqtarëve të Gjykatës së Lartë. Mbledhja është e vlefshme nëse marrin pjesë jo më pak se një të dytat e të gjithë gjyqtarëve të Gjykatës së Lartë.
Lista me kandidatët u bëhet e njohur më parë të gjithë pjesëmarrësve në mbledhje”, thuhet në ligj. Por gazeta ka mësuar se mund të futet në lojë përcaktimi i nenit 4. Sipas tij, nëse nuk arrihet kuorumi i nevojshëm kandidati i pari në listë quhet i miratuar.
“Për çdo vend vakant votohet për secilin nga kandidatët e renditur në tre vendet e para të listës. Kandidati që merr tri të pestat e votave të gjyqtarëve të pranishëm shpallet i zgjedhur. Nëse nuk arrihet shumica e nevojshme, kandidati i renditur i pari nga Këshilli i Emërimeve në Drejtësi konsiderohet i zgjedhur”, thuhet në ligj.
