Lulzim Basha pritet të mos pranojë Lëvizjen Socialiste për Integrim në listat e Partisë Demokratike. Gazeta e ka deklaruar se pas ndryshimit të Kodit Zgjedhor, i cili nuk lejon koalicionet parazgjedhore, përplasjet dhe rivaliteti në opozitë janë shtuar ndejshëm.
Por sipas informacioneve mësohet se Basha ka refuzuar edhe ofertën strategjike të partisë presidenciale për ndarjen e listave të PD me LSI në qarqet e vogla. Mësohet se pavarësisht presionit të presidentit Ilir Meta, kryetares së Lëvizjes Socialiste për Integrim, Monika Kryemadhi, lideri demokrat ka vendosur të përzërë LSI-në, duke mos e futur këtë të fundit në listat e Partisë Demokratike.
Pra, mësohet se zoti Basha ka refuzuar ndarjen e listave me Lëvizjen Socialiste për Integrim në qarqet e vogla, duke pranuar kështu edhe kërkesën e kahershme të bazës demokrate dhe aleatëve tradicionalë që opozita e bashkuar të shkojë në zgjedhjet parlamentare të 25 prillit të këtij viti me dy lista, ku në njërën të jetë PD dhe në tjetrën të jetë LSI.
Madje, lënien jashtë listave të Partisë Demokratike e ka pohuar edhe Sekretari i Përgjithshëm i Lëvizjes Socialiste për Integrim, Endrit Braimllari gjatë një prononcimi për mediat dy ditë më parë. “Lëvizja Socialiste për Integrim duhet të garojë më një listë më vete, sepse LSI ka identitetin e vet politik, është një forcë politike e cila në këto 16 vite të krijimit të saj i ka dhënë shumë vendit duke krijuar një forcë, e cila në gjithë filozofinë e saj thelbin e saj e ka pasur tek integrimi”, deklaroi Braimllari.
Megjithatë mbetet të shihet gjatë këtij muaji se çfarë do të ndodhë më konkretisht, kohë kur pritet që lideri demokrat, Lulzim Basha të bëjë publike marrëveshjen me aleatët se si opozita do të hyjë në zgjedhjet e 25 prillit.
Basha i rrëmben Kryemadhit kauzat e fushatës
Por përzënia apo lënia e Lëvizjes Socialiste për Integrim jashtë listave të Partisë Demokratike nuk është e vetmja goditje që kryedemokrati Lulzim Basha po i jep partisë së Kryemadhit. Ditët e fundit po vihet re një rivalitet brenda opozitës së bashkuar dhe një gjë të tillë po e tregon edhe Basha me lëvizjen e tij të fundit, sikundër është rrëmbim i kauzave të LSI.
Kjo e fundit “Thembrën e Akilit” ka rininë, të cilën e josh me çdo lloj mënyre për të pasur në parti dhe mbështetur, kështu që duket se një gjë të tillë po e bën edhe zoti Basha, i cili ka intensifikuar takimet me të rinjtë, në mënyrë që t’i bëjë për vete. Sinjali më i freskët ka qenë dje, ku lideri demokrat ka rinisur takimet me të rinjtë dhe këtë herë me gjimnazistët e Tiranës.
Gjatë fjalës së tij, ndër të tjera Basha theksoi se rinia shqiptare është motivimi i PD, ndërsa premtoi para gjimnazistëve se sapo të vijë në pushtet do të zerojë tarifat e studimit me 90% dhe madje do të ofrojë shkollim falas për të rinjtë që vijnë nga familje me të ardhura të pakta. “Ne sigurisht atë plan që i vumë në dispozicion qeverisë, jemi të gatshëm ta nisim ta zbatojmë prej ditës sonë të parë të marrjes së përgjegjësive të qeverisjes së vendit.
Prioriteti ynë jeni ju të dhjetë këtu dhe jo 10 oligarkët dhe qindra e mijëra të tjerë si ju, të jeni të sigurt që do të marrim të gjitha masat që të paktën standardet që sigurojnë vendet e tjera të rajonit për sa i përket arsimit parauniversitar, por edhe atij universitar, t’u garantohen edhe të rejave edhe të rinjve shqiptarë. Në sistemin e lartë arsimor do të ketë një ndryshim. Ne do të ofrojmë pa pagesë studimin për ata që janë në master dhe bachelor, për fëmijët që vijnë nga familje me të ardhura të pakta”, deklaroi kryedemokrati Lulzim Basha.
