Kryetari i Partisë Demokratike, Lulzim Basha duket se ka gati vendimin për t’u distancuar nga Lëvizja Socialiste për Integrim.
Prej disa javësh partitë politike kanë ndezur motorët e fushatës zgjedhore, ndërsa e vetmja që duket një hap para, është Partia Socialiste, për shkak se opozita e drejtuar nga Partia Demokratike nuk e ka zbuluar ende strategjinë si do të hyjë në zgjedhjet e 25 prillit, duke shtuar kështu ankthin tek partitë aleate, e sidomos tek Lëvizja Socialiste për Integrim.
Arsyeja kryesore që opozita joparlamentare ka mbetur në vend numëro është se ajo i ka pasur sytë tek Komisioni Venecias, të cilit i kërkoi që të zhbënte ndryshimet kushtetuese dhe Kodin e ri Zgjedhor, sipas variantit të mazhorancës. Por Venecia tashmë ka folur dhe ka rrëzuar pretendimet e opozitës dhe presidentit Ilir Meta, pasi ka njohur Kodin e ri Zgjedhor, ç’ka do të thotë se palët tashmë do të shkojnë në zgjedhjet parlamentare të 25 prillit të vitit 2021 me lista të hapura dhe pa koalicione parazgjedhore.
Vetë aleatët tradicionalë të Bashës ditët e fundit kanë shtuar dozën e presionit, duke kërkuar me ngulm të dinë si do të shkojë opozita në zgjedhje dhe kërkuar gjithashtu që LSI të dalë në listë më vete nga PD dhe partitë e tjera. Kështu që i ndodhur përpara dy zjarreve, ku nga njëra anë aleatët tradicionalë dhe nga ana tjetër baza demokrate nuk e duan partinë e Kryemadhit në lista, mësohet se Basha është gati të vulosë ndarjen me LSI për zgjedhjet e 25 prillit.
Madje, sipas informacioneve nga selia blu mësohet se me shumë gjasa Lëvizja Socialiste për Integrim do të jetë në listë më vete, ndërkohë që Partia Demokratike pritet të marrë rreth saj vetëm aleatët tradicionalë të saj, të cilët sikundër edhe vetë zoti Basha, nuk e kanë fshehur dëshirën që t’i mbyllin derën partisë së Kryemadhit.
Basha takon aleatët
Por për të qartësuar më shumë situatën, e cila tashmë ka marrë një tjetër rrjedhë pas raportit përfundimtar të Komisionit të Venecias, kryedemokrati Lulzim Basha ditën e djeshme ka pritur në selinë blu aleatët e tij tradicionalë, për të dakordësuar formulën me të cilën do të garojnë në zgjedhje.
Mësohet se krerët e partive opozitare kanë diskutuar sërish rreth 2 formulave më të mundshme, daljes me një listë të përbashkët, apo dy lista, të udhëhequra nga Partia Demokratike dhe Lëvizja Socialiste për Integrim. Mirëpo shumë mundësi ka që PD të ketë listën e saj, ndërsa LSI listën e saj, duke konfirmuar edhe njëherë atë që ka deklaruar gazeta se Basha nuk e do partinë e Kryemadhit në koalicion.
Ndërkohë të njëjtat burime theksuan për gazetën se vendimi për koalicionet pritet të merret brenda javës, pasi aleatët e kanë këshilluar Bashën të mos humbë më kohë, në kushtet kur edhe Komisioni i Venecias e tha fjalën e fundit për ndryshimet e Kodit Elektoral.
Mediu shton presionet
Megjithatë, pavarësisht takimit të djeshëm aleatët tradicionalë kanë shtuar presionet ndaj liderit demokrat, Lulzim Basha për të zbuluar strategjinë se si opozita do të shkojë në zgjedhjet e ardhshme. Ka qenë kreu i Partisë Republikane, Fatmir Mediu, i cili ka shfrytëzuar një takim me koordinatorët e PR në Tiranë, ndërsa i ka bërë thirrje opozitës që të bashkohen në çdo qendër votimi për t’i vënë fre manipulimit të Edi Ramës dhe tendencës së tij për të kontrolluar gjithçka.
Madje, Mediu theksoi se opozita duhet të reagojë sa më shpejt, në të kundërt do të jetë shumë vonë. “Shqetësimi im është që Edi Rama po përgatitet për një fushatë të quajtur virtuale, për votime online nëpërmjet platformës e-Albania. Opozita në qoftë se mendon se do të jetë vëzhguese e procesit dhe të shikojë se çfarë do të thotë pas procesit, asnjë gjë nuk ndryshon pas procesit. E vetmja mënyrë është që ne duhet të bashkohemi në çdo qendër votimi sot si opozitë dhe të përpiqemi që t’i vëmë fre manipulimit, krimit, korrupsionit dhe t’i vëmë fre tendencës së Edi Ramës për të kontrolluar çdo gjë në jetën tonë, sepse do të jetë vonë në qoftë se nuk reagojmë shpejt”, deklaroi Mediu.
