Ish-gjyqtarja Arjana Fullani ka nisur një betejë të fortë me organet e vetingut duke mos pranuar përjashtimin nga sistemi për 15 vite. Zonja në fjalë është bashkëshortja e ish-guvernatorit Ardian Fullani, i cili jo vetëm nuk u dënua, por i mori shtetit miliona lekë.
Gjyqtarja Fullani u largua nga Gjykata e Lartë dhe nuk pranoi të kalonte në Apel. Për këtë arsye Komisioni i Pavarur i Kualifikimit ndërpreu vetingun për të dhe e përjashtoi për 15 vite. Mirëpo Fullani nuk e pranon këtë gjë dhe i është drejtuar Kolegjit të Apelimit, i cili mbajti dje mbledhjen e parë. Në Apel, Fullani kërkoi shfuqizimin e vendimit të KPK të korrikut 2019, përmes të cilit ajo përjashtohet nga sistemi i drejtësisë për 15 vite.
Ky vendim u mor pas interpretimit të komisionerëve të vetingut se ish-gjyqtarja e Lartë kishte hequr dorë nga statusi i magjistrates. Sipas Fullanit, vendimi i KPK për ndërprerjen e procesit të vetingut ndaj saj, ishte marrë në një proces të parregullt ligjor.
Ish-gjyqtarja nuk ka qenë dje në proces, por përfaqësohej nga avokatja Evelina Qirjako. “Përpjeka për t’i shkuar deri në fund ndryshimit të vendimit të KPK nuk ka të bëjë aspak me faktin për të ju shmangur vetingut, pasi ligji parashikon se asnjë ish-gjyqtar dhe ish-prokuror s’mund të jetë pjesë e gjykatave apo KLGJ dhe KLP pa kaluar më parë vetingun.
Sanksioni prej 15 vjetësh për të mos patur të drejtën për të mos aplikuar për pozicione të caktuar më është kthyer në vështirësitë madhe në jetën e përditshme për shkak të paragjykimit, pasi mua më cilësojnë si të papërshtatshme për të ushtruar detyra si juriste”, thuhet në kërkesë. Vendimi përfundimtar për kërkesën e saj pritet të merret në seancën e radhës, caktuar në 11 nëntor, ora 10:00.
Absurdi
Absurdi i procesit është se si zonja Arjana Fullani ashtu dhe Evelina Qirjako kanë qenë të dyja gjyqtare të Gjykatës së Lartë, por sot janë avokate. Të dyja dhanë dorëheqjen nga sistemi duke iu shmangur sistemit, ndërsa dje Qirjako mbronte Fullanin. Vetë zonja Fullani ka hapur një zyrë të madhe avokatie në vend.
Gazeta e ngriti si shqetësim pak kohë më parë se të shkarkuarit apo dorëhequrit janë kthyer në avokatë duke mos ju hyrë gjemb në këmbë. Ndërkohë mësohet se një kërkesë të ngjashme ka bërë në Kolegj dhe zonja Qirjako për veten e saj, bashkë me gjyqtarin Aleksandër Muskaj. Të tre emrat kanë pasur në dorë shumë dosje të bujshme.
Dosjet e bujshme
Arjana Fullani është një emër i njohur në sistemin e drejtësisë sepse ka pasur disa doje të bujshme në dorë. Ndër më të bujshmet është padyshim ajo e Ilir Metës për bllokun 700 mijë euro. Nëse shohim detajet, përveç Ardian Fullanit që kishte mendim paralel, të gjithë që votuan pro, sot janë jashtë drejtësisë.
Trupa gjyqësore që gjykoi Metën përbëhej nga: Ardian Dvorani, Gani Dizdari, Majlinda Andrea, Arjana Fullani dhe Guxim Zenelaj. Katër emrat e fundit dolën të gjithë në mbështetje të Ilir Metës, duke dhënë votë për pafajësi, ndërsa Ardian Dvorani doli me mendim paralel, duke kontestuar vendimin në disa pika.
Por 4 emrat e tjerë e gjejnë sot veten jashtë sistemit të drejtësisë. Gani Dizdari ngeli në veting, Majlinda Andrea u dënua me 4 vite burgim për korrupsion, por që u konvertua në shërbim prove. Ndërkohë, dy emrat e mbetur (Arjana Fullani dhe Guxim Zenelaj), vendosën të tërhiqen përfundimisht nga funksioni, duke mos pranuar të futen në veting.
Ligji për Gjykatën e Lartë përcakton që anëtarët e saj në momentin që mbarojnë mandatin, duhet që të emërohen gjyqtarë në një prej gjykatave të Apelit në vend. Por emrat më lart e kanë refuzuar një gjë të tillë, duke deklaruar se nuk do e ushtrojnë më funksionin e gjyqtarit.
