Vendimi i Gjykatës Kushtetuese në Kosovë që i ka dhënë të drejtë presidentit Hashim Thaçi në lidhje me dekretimin e Avdullah Hotit nga Lidhja Demokratike e Kosovës për postin e kryeministrit ka shkaktuar debate dhe reagime edhe në Tiranë.
Për avokat Spartak Ngjelën ky vendim është ilegjitim dhe një goditje ndaj stabilitetit politik në Kosovë. Përmes një analize të publikuar në rrjetet sociale, avokat Ngjela deklaroi dje se është absurde që Lëvizja Vetëvendosje që përfaqëson shumicën e qytetarëve të Kosovës të privohet të qeverisë nga një vendim korruptiv i gjykatës, ndërsa theksoi se ky veprim çon ujin në mullirin e Rusisë dhe Serbisë.
“Gjykata Kushtetuese e Kosovës, bëri një gabim historik: goditi stabilitetin e shtetit të Kosovës, për të ndihmuar korrupsionin e lartë shtetëror. Por nga kjo përfiton drejtpërsëdrejti Moska dhe Beogradi. Janë naivë: ku mund të privohet një mazhorancë popullore me një vendim gjykate që nuk thotë dot asgjë teorike! Por, a do ta lejojë shumica popullore të funksionojë një Parlament që ecën me paterica korruptive të pakicës popullore?
Kurrë; se në një shtet demokratik nuk privohet dot nga pushteti politik mazhoranca popullore. Kjo do të ndodhë dhe në Kosovë. Sepse, nëse masa kompakte popullore e rrethon Kuvendin e Kosovës që në mbledhjen e parë të tij, të nesërmen do të shkohet domosdoshmërisht në zgjedhje të reja.
Çdo krizë në demokraci, sheshohet ose me kompromis, ose me zgjedhje”, deklaroi ai. Megjithatë, pavarësisht vendimit që i jep të drejtë presidentit Thaçi dhe i hap rrugë krijimit të qeverisë nga LDK dhe AAK e Nisma, avokat Spartak Ngjela paralajmëron se Kosova do të ketë krizë dhe se sipas tij, shumë shpejt vendi do të shkojë në zgjedhje të parakohshme.
“Bllokimi i mundshëm i Kuvendit të Kosovës nga populli mazhoritar, do ta çojë gjendjen në zgjedhje të reja. Po Gjykata Kushtetuese e Kosovës që e solli këtë gjendje destabilizuese? Vendimi i saj joprofesional quhet në të drejtën penale: condicio sine qua non – kushti pa të cilin – domethënë, shkaku kryesor i përplasjes shoqërore. Anëtarët e asaj gjykate, të cilët e votuan vendimin që kemi parë, nëse ai është i vërtetë; do të shkojnë në proces penal. Të shohim sesi do të precipitojnë ngjarjet”, nënvizoi Ngjela.
Reagon Spahiu
Nga ana tjetër ish-kreu i Aleancës Kuq e Zi, Kreshnik Spahiu e ka cilësuar vendimin e Gjykatës së Kosovës legjitim, të drejtë dhe që duhet të merret shembull nga politika shqiptare në Tiranë dhe Prishtinë. Përmes një analize të publikuar në rrjetet sociale, zoti Spahiu theksoi se ky vendim shëndosh politikën kosovare dhe mbyll çdo shteg për vendet apo edhe aktorët vendas që kërkonin të shfrytëzonin situatën për të destabilizuar Kosovën. Sipas tij, partia e Kurtit është pakicë tanimë referuar rezultateve të zgjedhjeve të fundit parlamentare.
“Sot Gjykata Kushtetuese e Prishtinës ka publikuar verdiktin: Kosova duhet të qeveriset nga shumica parlamentare dhe nuk është nevoja për zgjedhje të parakohshme. Për të gjithë tifozët politikë të partive në Tiranë apo Prishtinë po jap disa argumenta pse vendimi i Gjykatës së Kosovës ishte kushtetues, legjitim, historik dhe leksion për kokat e nxehta në Tiranë dhe Prishtinë: Sepse me këtë vendim mbyllet çdo hapësirë për destabilizimin e Kosovës. Për ta sqaruar për të gjithë qytetarët që s’kanë njohuri juridike.
Një vendim i kundërt mund ta linte Kosovën 10 vjet pa qeveri. Pra nëse do shkohej në zgjedhje, dhe rezultati nëse do ishte sërish që asnjë parti nuk arrinte 51% do duhej sërish zgjedhje, sërish zgjedhje, sërish zgjedhje pa limit; Sepse shtetin e qeverisin shumicat dhe jo pakicat; Vetëvendosja ishte votuar 26% dhe zyrtarisht 74% konsiderohen kundër saj”, deklaroi ish-kreu i Aleancës Kuq e Zi, Kreshnik Spahiu.
