Ministri i Jashtëm grek, Nikos Dendias, do të vizitojë ditën e sotme Tiranën, ku do të takohet me krerë të shtetit dhe politikës.
Dje u zbardh axhenda e takimeve të cilat nisin në orën 11:00 fillimisht me ministrin e Jashtëm në detyrë Gent Cakaj. Diskutimet sipas Ministrisë së Jashtme greke do të përqendrohen në çështje me interes dypalësh, europian dhe rajonal me theks në rrjedhën e marrëdhënieve greko-shqiptare, zhvillimet në rajonin e Mesdheut Lindor dhe perspektivën europiane të Ballkanit Perëndimor.
Më pas ministri i Jashtëm do të pritet nga kryeministri i Shqipërisë, Edi Rama dhe presidenti i vendit, Ilir Meta. Në përfundim të takimit me Ramën do të kenë dhe një konferencë të përbashkët për shtyp. Gjatë vizitës së tij, ai do të zhvillojë gjithashtu bisedime me kryetarët e Partisë Demokratike dhe Bashkimit për të Drejtat e Njeriut, Lulzim Basha dhe Vangjel Dule, si dhe me biznesmenë grekë që operojnë në Shqipëri.
Një nga temat kryesore të bisedimeve do të jetë dhe çështja e detit me Shqipërinë. Kryediplomati helen shpreson te rinisja e dialogut mes Shqipërisë dhe Greqisë rreth kësaj marrëveshje, ndërsa theksonte se zgjidhja e problemeve të vjetra është edhe në interesin e Shqipërisë duke pasur parasysh perspektivën europiane.
Në fund të vizitës së tij, ministri i Jashtëm do të takohet me Lumturinë e Tij Kryepeshkopin Anastasios të Tiranës, Durrësit dhe të gjithë Shqipërisë. Ndërkohë që pak kohë më parë ministri i Jashtëm në detyrë i Greqisë, Nikos Dendias, ka komentuar ecurinë e bisedimeve me Shqipërinë dhe Greqisë, lidhur me çështjen e kufirit detar.
Në një intervistë për mediat greke, kryediplomati ka deklaruar se dëshiron që të zgjidhen sa më shpejt çështjet e prapambetura me Shqipërinë. Mes të tjerash, ministri Dendias ka theksuar se me Shqipërinë ishte nënshkruar marrëveshja e vitit 2009, por që sipas tij, nuk pati zhvillim për arsye të panjohura, duke shtuar së është mirë që të arrihet një marrëveshje e kënaqshme për të dyja palët.
