Ndonëse mazhoranca u tërhoq nga ligji për mekanizmin zhbllokues në betimin e gjyqtarëve kushtetues, që kishte miratuar më herët, Komisioni i Ligjeve me shumicë votash rrëzoi dje dekretin e presidentit Ilir Meta për betimin e anëtarëve të Gjykatës së Lartë dhe atyre të SPAK.
Dekreti “Për kthimin e ligjit nr. 15/2020 “Për disa shtesa dhe ndryshime në ligjin nr. 96/2016, “Për statusin e gjyqtarëve dhe prokurorëve në Republikën e Shqipërisë”, të ndryshuar”, u relatua nga deputetja e Partisë Socialiste, Klotilda Bushka, ndërsa u paraqit për komisionin nga përfaqësuesja e institucionit të Presidencës, Katrina Treska.
Kjo e fundit paraqiti argumentet për kthimin e ligjit për rishqyrtim në Kuvend, duke theksuar se nenet 2, 4, 5, dhe 8 të ligjit të miratuar nga Kuvendi, bien në kundërshtim me nenet: 7, 42, 116, 140, 145, 147/a dhe 147/d, të Kushtetutës së Republikës së Shqipërisë dhe me jurisprudencën e Gjykatës Kushtetuese.
Sipas Treskës, këto dispozita, të miratuara në mungesë të një konsultimi gjithëpërfshirës, shkelin: parimin e sigurisë juridike; parimin e pavarësisë dhe paanësisë së gjyqësorit; parimin e hierarkisë së normave kushtetuese dhe rezervën kushtetuese dhe jurisprudencën e Gjykatës Kushtetuese. Por nga ana tjetër, deputetja Bushka, gjatë relatimit të saj i konsideroi argumentet e sjella nga presidenti si perceptime dhe jo arsyetime të qenësishme për të kundërshtuar një ligj.
Madje, lidhur me pretendimet për shkelje të Kushtetutës në lidhje me ceremoninë e betimit të magjistratëve, Bushka argumentoi se dispozita nuk cënon asnjë parashikim kushtetues. “Kushtetuta në asnjë nen të saj nuk ka parashikuar institutin e betimit të magjistratit dhe aq më pak në organin përpara të cilit mund të bëhet ky betim”, u shpreh relatorja, e cila më pas i propozoi komisionit rrëzimin e dekretit presidencial.
Pas diskutimeve, komisioni votoi për rrëzimin e dekretit në fjalë. Por risia e ndryshimeve në këtë ligj është se gjyqtarët dhe prokurorët e Strukturës së Posaçme Kundër Korrupsionit Dhe Krimit Të Organizuar marrin rrogë shtesë për vështirësi në punë, ndërkohë që do të forcohet edhe roli i Inspektorit të Lartë të Drejtësisë, i cili mund të nisë hetimet apo pezullojë punën e një prokurori apo gjyqtari në rast se ka dyshime të arsyeshme për shkelje të ligjit apo tejkalime kompetencash nga ana e njerëzve të drejtësisë.
