Një ditë pasi ka shkuar në Parlament marrëveshja për vaksinën kundër Covid-19, komisionet parlamentare kanë nisur me miratimin e paktit me miliarderin amerikan Bill Gates.
Dje u mblodh Komisioni i Ekonomisë dhe ai i Politikës së Jashtme, ku si temë diskutimi kishin marrëveshjen mes Ministrisë së Shëndetësisë dhe Aleancës Gavi, e cila financohet nga miliarderi amerikan. Të pranishëm në komision për prezantimin e projektligjit ishte zëvendësministri i Shëndetësisë Albert Nikolla dhe sekretarja e përgjithshme e ministrisë, Geraldina Prodani.
Zëvendësministri Nikolla u shpreh se, kjo nismë shkon në të njëjtën linjë me përpjekjet dhe menaxhimin e situatës së pandemisë nga qeveria shqiptare. Ai deklaroi se në kontekst më të gjerë shkon paralel me hapat e Komisionit Europian për sigurinë dhe hapat e vendeve të tjera të Europës, duke ruajtur hapat dhe ecurinë sipas kritereve shkencore dhe jo ato ideologjike. Sipas zv.ministrit vaksina kundër Covid-19 do të jetë fillimisht për shtresat vulnerabël dhe për bluzat e bardha, që sipas tij janë në vijën e parë të luftës.
“Kjo vaksinë në këtë masë që do të jetë do të shkojë direkt për personat më vulnerabël dhe personat që janë në linjën e parë të luftës për Covid19”, tha Nikolla. Ndërsa sekretarja e përgjithshme e ministrisë, Geraldina Prodani u shpreh se iniciativa është e OBSH-së dhe e vendeve të BE-së, për t’iu përgjigjur bashkërisht situatës. Ajo theksoi se për këtë vaksinë ka një kërkesë globale prej 2 miliardë dozash. “Covax nënkupton mbledhjen e të gjithë shkencëtarëve, vendeve, kompanive dhe bizneseve për të siguruar vaksinën antiCovid, përballë kërkesës globale në 2 miliardë doza”, u shpreh Prodani.
Gjithashtu ajo shtoi se falë pjesëmarrjes, procedurat e tenderimit do të bëhen nga vetë instrumenti “Covax”, e se në fund të dhjetorit pritshmëritë janë që do të ketë një vaksinë, e që me anë të këtij instrumenti ne do ta sigurojmë në kohë atë. Pas diskutimeve, Komisioni i Jashtëm e miratoi këtë projektligj. Po ashtu, marrëveshja mes qeverisë shqiptare dhe Aleancës Gavi u diskutua edhe në Komisionin e Ekonomisë.
Përfaqësues të Ministrisë së Shëndetësisë prezantuan para deputetëve të komisionit marrëveshjen, ku sqaruan rëndësinë që ka miratimi i saj. Pas diskutimeve dhe pyetjeve, anëtarët e Komisionit të Ekonomisë e miratuan këtë marrëveshje. Ndërkohë që ditën e hënë, marrëveshja mes qeverisë shqiptare dhe Aleancës Gavi do të diskutohet edhe në Komisionin e Ligjeve, i cili është komision për dhënie mendimi dhe më pas në Komisionin e Shëndetësisë, i cili nën përgjegjësinë e komisionit përgjegjës do të diskutojnë mbi këtë dhe më pas pritet ta miratojnë.
Ja si do merret vaksina nga Gates
Vaksina kundër korovavirusit do të sigurohen nga Aleanca Gavi e cila financohet nga fondacioni i Bill dhe Melinda Gates. Këshilli i Ministrave ka kërkuar që të blejë një milion e njëqind e dyzet mijë doza vaksine anti-covid duke nënshkruar një marrëveshje me “Covax Facility”.
Ajo ka prenotuar sasinë e vaksinave që nevojiten për 20% e popullsisë. Sipas aktmarrëveshjes që është depozituar në Kuvendin e Shqipërisë, një person do të marrë dy doza vaksine dhe sasia prej 1.14 milionë dozash do të shërbejë për rreth 570 mijë shqiptarë.
Shuma totale që Shqipëria po i jep Covax është 3.99 milionë dollarë, një shumë parash do të rrijë e “ngrirë” nga pala shqiptare deri në zbulimin e vaksinës, pasi në marrëveshje është vendosur si klauzolë që vaksina do të merret pasi të certifikohet nga Organizata Botërore e Shëndetësisë.
Shqipëria i është bashkuar kështu vendeve të varfra të Europës dhe mbarë botës, për të siguruar në kohë dozat e vaksinës, nëpërmjet Fondacionit Gates ndërkohë që vendet e pasura kanë rezervuar miliona doza.
