Ish-kreu i Aleancës Kuq e Zi, kreshnik Spahiu, e ka cilësuar dje fitoren e Albin Kurtit si një “dhuratë” nga faktori ndërkombëtar.
Jo rastësisht pas arrestimit të Hashim Thaçit, Kadri Veselit e Jakup Krasniqit, Kosova shkoi në zgjedhje të parakohshme. Po ashtu Ramush Haradinaj u largua nga posti i kryeministrit pas marrjes në pyetje nga Haga. Përmes një statusi në rrjetin e tij social Facebook, Spahiu ka renditur pikërisht këta faktorë si një arsye e fitores së Kurtit ndërsa ka bërë një paralele me situatën në Shqipëri.
“Shqipëria do lindë një Albin, kur një avion i Hagës të burgosë në Rinas, njësoj si në Kosovë, 3 kundërshtarët e “Albinit të Tiranës”. Të 4 partitë e vjetra historike në Kosovë janë fundosur me votat e shqiptarëve të Kosovës. Në fakt Vetëvendosja kishte garuar disa herë, por maksimumin e kishte poshtë 27% dhe të pamjaftueshme të qeveriste e vetme. Shqiptarët e Kosovës ishin lodhur dhe dërmuar maksimalisht nga qeverisjet e korruptuara, por establishmenti ishte i pathyeshëm si në Shqipëri.
Edhe Albini nuk arrinte të shkatërronte establishmentin deri sa drejtësia ndërkombëtare filloi arrestimet. Mos harrojmë Ramush Haradinaj u godit nga Gjykata e Hagës në kulmin e karrierës politike dhe ku po triumfonte si kryeministër me taksën 100% kundër Serbisë. Më pas Hashim Thaçi, Jakup Krasniqi dhe Kadri Veseli u arrestuan dy ditë pasi presidenti Trump humbi zgjedhjet në Amerikë”, tha Spahiu.
Paralelizmi me Shqipërinë
Ish-kreu i aleancës u shpreh se këto nuk janë justifikime, por rrethana të cilat të bëjnë të kuptosh se pse ende në Shqipëri nuk është krijuar një “Vetëvendosje” si e Kosovës. Ai tha me bindje të plotë se një parti e re asnjëherë nuk do të shkatërrojë PD-PS-LSI.
Sipas Spahiut, Shqipëria nuk i largon dot liderët e vjetër politikë ashtu si dhe Kosova nuk i largoi dot pa pranga dhe burgosje. Spahiu deklaroi se në vendin tonë do të lind një Albin vetëm atëherë kur një avion i Hagës, në Rinas të arrestojë liderët e vjetër politikë tashmë prej 30 vitesh në pushtet. “Këto nuk janë justifikime, por rrethana për të kuptuar që pse nuk lind dot një “Vetëvendosje” në Shqipëri.
Shqipëria ashtu si Kosova nuk i largonte dot pa pranga dhe burgosje liderët e vjetër. Vota ishte e pamjaftueshme. Nëse Albini do garonte në Shqipëri kundër PD-PS-LSI nuk do gjente as votën e tij, jo se nuk do votohej por se do vidhej. Koha do provoj, këto çfarë them kur të shikoni rezultatin e Vetëvendosjes në Tiranë në zgjedhjet e 25 Prill. Harroni që PD-PS-LSI të shkatërrohen nga një parti e re në Shqipëri.
Albini në Shqipëri do lindë, kur një avion i Hagës të arrestoj në Rinas, ashtu si në Kosovë liderët 30 vjeçarë të politikës. Deri atëherë s’do ketë as Albin dhe as Vetëvendosje në Shqipëri”, tha Spahiu. Ai u shpreh se Kosova ka nxjerrë nga politika, figura të vjetra politike madje heronj lufte, ndërsa Shqipëria do të votojë të njëjtët tashmë prej 30 vitesh.
Sipas tij ndryshimi mes Shqipërisë është se ne votojmë figura të ricikluara ndërsa ata ndryshimin. “Sot Kosova me votë apo me pranga ka nxjerr nga politika 100% të liderëve 15 vjeçar, ndonëse heronj lufte. Ndryshe Shqipëria në 25 Prill do rivotoj 100% gjithë xhaketat 30 vjet më të vjetra se Kosova: Berisha, Kryemadhi, Meta, Rama, Ruçi, Basha. Shqiptarët e Shqipërisë votojnë të vjetrën dhe riciklimin ndërsa Shqiptarët e Kosovës votojnë të renë dhe ndryshimin”, u shpreh ai. /ALEKSANDRA HOXHAJ
