Dorëzimi i dosjes së Sali Berishës në Kongres, pritet të shtojë telashet për ish-kryeministrin shqiptar. Gazeta “SOT”, ishte e para që publikoi në numrin e së enjtes lajmin se DASH ka dorëzuar në Kongres dosjen për Berishën, ndërkohë dje ka qenë ambasadorja amerikane Yuri Kim, ajo e cila në Twitter ka publikuar vendimin e DASH.
Ajo ka shpërndarë linkun e listës së emrave që janë dërguar në Kongres. Por edhe pse duket si procedurë normale, tani rrezikon që të hapet “kutia e Pandorës” për ish-kryeministrin. Në Kongres nuk ka vajtur thjesht lista me emra, por ka shkuar dosja me provat që amerikanët kanë për ish-kryeministrin.
Një gjë e tillë është përcaktuar tërësisht në nenin 7031, nen mbi bazë të së cilit Berisha u shpall “non grata”. Një numër i caktuar kongresmenësh kanë të drejtë të njihen edhe me dokumentet top sekret që janë aty s ai takon pretendimeve për zhytjen e ish-kryeministrit në afera. “Sekretari i Shtetit do të paraqesë një raport në të cilin nëse shihet e nevojshme do të përfshihet një aneks i klasifikuar drejtuar komiteteve përkatëse të Kongresit dhe komisioneve për gjyqësorin.
Në këto anekse do të përshkruhet informacioni i lidhur me korrupsionit ose me dhunimin e të drejtave të njeriut në lidhje me secilin prej individëve të shpallur të papërshtatshëm në 12 muajt paraardhës në përputhje me paragrafin (1) (A) si dhe individët të cilët Sekretari i Shtetit i ka përcaktuar ose identifikuar si të përputhshëm me paragrafin (1)”, theksohet aty. Pra dosja tani rrezikon të hapet dhe nuk është çudi që të dalin në shesh provat e amerikanëve. Ambasadorja Kim dha sinjale se nuk ka asnjë tërheqje në këtë aspekt, ndërkohë që tashmë duket se po shkohet drejt hapjes së “Kutisë së Pandorës”.
Bllokimi i pasurive korruptive
Në një kohë kur dosja për Berishën ka shkuar në Kongres, Shtetet e Bashkuara të Amerikës kanë nisur lëvizjet për të bllokuar pasuritë e pushtetarëve të korruptuar në Ballkan. Pak muaj më parë presidenti Joe Biden, nxori një dekret që penalizon të gjithë ata të cilët minojnë demokracinë dhe kërcënojnë paqen në rajon.
Për të gjithë ata të cilët futen në listë të zezë do të ketë bllokim të pasurive dhe Biden ka zgjedhur një individ të posaçëm, i cili do të merret me sanksionet. Presidenti Biden, ka përzgjedhur diplomatin James O’Brien për të zbatuar në praktikë urdhrin e tij ekzekutiv, ku parashikohet bllokimi i pasurive si dhe ndalimi i hyrjes në SHBA për ata zyrtarë nga Ballkani Perëndimor që janë të përfshirë në korrupsion.
O’Brien do të ketë gradën e ambasadorit ndërsa para se të marrë postin e ri duhet të konfirmohet nga Senati amerikan. O’Brien është i njohur me situatën në Ballkanin Perëndimor, sepse ka punuar më parë në këtë rajon. Shtëpia e Bardhë në konsultim me Departamentin e Shtetit me emërimin e zotit O’Brien do të vazhdojë ta përditësojë listën e individëve që u nënshtrohen sanksioneve sipas këtij urdhri.
Procesi i krijimit të “listave të zeza” të SHBA me të shpallur “non grata” ka rezultuar proces shumë i ngadalshëm. Ndërkohë, urdhri i ri presidencial ka përfshirë edhe Shqipërinë dhe zgjeron kriteret për kërcënimet aktuale ndaj sigurisë kombëtare të Shteteve të Bashkuara dhe interesave të politikës së jashtme në rajon, duke përfshirë pengimin e proceseve demokratike dhe gjyqësore, korrupsionin dhe krimin e organizuar.
Për momentin duhet deri në 10 vjet para se një person të gjendet në këtë listë të zezë. Sipas Shtëpisë së Bardhë, korrupsioni dëmton drejtpërdrejt politikën e jashtme dhe sigurinë kombëtare të Shteteve të Bashkuara dhe të partnerëve e aleatëve të tyre, ndërsa Departamenti i Shtetit ua ka ndaluar hyrjen në territorin amerikan shumë zyrtarëve në rajon, emra të cilët janë bërë ose jo publikë. /NGA SIDORELA BRAÇJA
9 TETOR 2021
