Humb betejën me koronavirusin mjeku Arjan Tushi. Ministria e Shëndetësisë njofton me hidhërim të thellë ndarjen nga jeta të profesorit të Fakultetit të Mjekësisë, i cili referuar shërbimit infektiv,
ndërroi jetë pak momente më parë në spitalin Infektiv, i prekur nga COVID19, pavarësisht përpjekjes maksimale të stafit mjekësor.
Pushi është viktima e parë në radhët e bluzave të bardha në vendin tonë që prej shfaqjes së koronavirusit.
Prof. Arjan Pushi ka patur një karrierë të spikatur në fushën e hematologjisë dhe ka përgatitur shumë breza studentësh të Mjekësisë.
Ministria e Shëndetësisë i shpreh ngushëllime famljarëve dhe miqve të profesor Arjan Pushit.
Manastirliu: U prehsh në paqe Profesor Pushi!
Ministrja e Shëndetësisë, Ogerta Manastirliu, ka shprehur ngushëllimet për ndarjen nga jeta të mjekut.
“Ndarja nga jeta e Profesor Arjan Pushit është një dhimbje e madhe për familjen, për miqtë e tij, për kolegët, pedagogët e Universitetit të Mjekësisë ku ka shërbyer për shumë vite.Kontributi i çmuar i Profesor Arjan Pushit për mjekësinë shqiptare, do të mbetet i pashlyeshëm ndër breza.Megjithë përpjekjet e kolegëve, të cilët bënë të pamundurën për ta mbajtur në jetë në spitalin infektiv, prof. Arjani nuk ia doli dot, në betejën me virusin e rrezikshëm.U prehsh në paqe Profesor Pushi!Ngushëllime të sinqerta familjes dhe miqve. Ju jemi pranë në këto momente të vështira!
Katër viktima në pak më shumë se 24 orë
Ndarja nga jeta e mjekut të njohur regjistron viktimën e katërt nga Covid në pak më shumë se 24 orë.
Më herët Ministria e Shëndetësisë njoftoi vdekjen e tre pacientëve.
“Një 44 vjeçare nga Durrësi, një pacient 71 vjeçar nga Tirana dhe një pacient 85 vjeçar gjithashtu nga Tirana. Të 3 pacientët kishin disa sëmundje bashkëshoqëruese dhe nuk kanë mundur dot të mbijetojnë për shkak të rëndimit të gjendjes shëndetësore, pavarësisht trajtimit intensiv nga stafi mjekësor”.
Ndërkohë shqetësuese mbetet vijimsia e shtrimeve në spitalin infektiv ku aktualisht po trajtohen 79 pacientë, 7 prej tyre janë në terapi intensive, ndërsa 3 janë të intubuar.
Vazhdon numri i lartë i rasteve të reja. Në 24 orët e fundit u regjistruan 69 raste pozitive nga 371 testime të kryera.
