Zbardhen detajet lidhur me diskutimet e ditëve të fundit nëse është shkarkuar apo jo Sekretari i Përgjithshëm i Kryeministrisë, Engjëll Agaçi. Zyra e shtypit e PS e përgënjeshtroi si lajm, por sipas burimeve kryeministri Edi Rama ka vendosur ta largojë Agaçin nga posti dhe kjo çështje është mbyllur.
Shumë shpejt pritet të bëhet dhe publikimi zyrtar i zëvendësimit të tij me dikë tjetër. Mësohet se Rama prej disa ditësh, detyrat e Sekretarit ja ka ngarkuar Sekretares së Përgjithshme të Ministrisë së Drejtësisë, Edlira Kokonës. Sipas burimeve, dy arsyet që kanë sjellë largimin e tij janë skandali me inceneratorët dhe humbja e gjyqit me Becchettin.
Sa i takon inceneratorëve në lojë ka hyrë SPAK dhe ujërat janë tensionuar mes tij dhe Ramës. Sipas burimeve, Agaçi është përgjegjësi kryesor për kalimin e dyshimtë të vendimeve, pasi ka përgatitur për t’u votuar në qeveri 17 vendime brenda një dite.
Duke qenë se tani po zbardhen të gjitha skandalet, kryeministri Rama mësohet se është acaruar shumë keq me të që nuk ka ndjekur si duhet këtë çështje, pasi nëse kemi arrestime të tjera, mazhoranca do ketë kosto të shumta politike. Po ashtu mësohet se ka pasur marrëdhënie shumë të krisur mes Agaçit dhe zv/kryeministrit duke sjellë dhe largimin e tij nga posti i Sekretarit të Përgjithshëm.
Një tjetër çështje është ajo e gjyqit me biznesmenin italian Becchetti. Agaçi ka qenë ai që ka ndjekur procesin, pasi është avokat me përvojë, ka punuar gjatë në Itali dhe ka eksperiencë në këtë fushë. Por humbja e gjyqit e ka futur në kolaps vendin dhe kjo ka ndikuar në krisjen raporteve mes tij dhe Ramës. Sipas burimeve, kontaktet mes tij dhe kryeministrit janë ndërprerë prej disa ditësh dhe një burim në Kryeministri i tha gazetës se brenda kësaj jave do të bëhet publik largimi i tij.
Reagon PD
Lidhur me shkarkimin e Agaçit nga funksioni ka reaguar edhe kreu i PD, Lulzim Basha. Ky i fundit u shpreh se sado qeveria e fsheh si fakt, çështja e inceneratorëve nuk do mbyllet vetëm me Lefter Kokën. “Fundi i vitit po afron, ndërkohë që një nga skandalet më të mëdha të 31 viteve ka plasur.
Ky është skandali i inceneratorëve. Ditën e djeshme është përhapur një lajm sikur Engjëll Agaçi, sekretari i Përgjithshëm i Kryeministrisë ka dhënë dorëheqjen. Sot, ky lajm nuk konfirmohet.
Pavarësisht çfarë kulisash po luhen, fakti është që arrestimi i Lefter Kokës është në vetvete një akt për t’u përshëndetur, por krejtësisht i pamjaftueshëm në qoftë se nuk shoqërohet nga një hetim i plotë, i thellë, i shpejtë dhe transparent sa i takon komunikimit me publikun, të pjesëve që mund të komunikohen me publikun”, tha Basha.
Kush është Engjëll Agaçi?
Engjëll Agaçi, ka lindur në Fier, më 15 Shkurt 1969. Është diplomuar në Fakultetin e Drejtësisë në Universitetin “Tor Vergata”, në Romë, ku edhe ka ushtruar për shumë vite profesionin e Avokatit.
Në vijim ka qenë kërkues shkencor në të Drejtën Ndërkombëtare Publike, duke e finalizuar me përfundimin e doktoraturës në Universitetin “La Sapienza” në Romë, ku dhe ka perfituar titullin Doktor Shkencash. Këshilli i Përgjithshëm i Akademisë Norman (Norman Academy) në Itali, i ka dhënë titullin honorifik të “akademikut të nderit”. Nga data 15 shtator 2013 mori funksionin e Sekretarit të Përgjithshëm të Këshillit të Ministrave.
