Shqipëria dhe Maqedonia e Veriut duket se do ta kenë mjaft të vështirë rrugën për anëtarësimin në Bashkimin Europian. Diskutimet e deritanishme në nivel të ulët përfaqësuesish, kanë krijuar dy grupe mes vendeve anëtare të Bashkimit Europian.
Nga njëra anë janë 14 vende si Italia, Austria, Rumania, Polonia, Hungaria, Sllovenia, Çekia, Sllovakia, Kroacia, Estonia, Letonia, Lituania, Malta dhe Irlanda që janë në mbështetje të Shqipërisë dhe Maqedonisë. Këto vende anëtare të Bashkimit Europian janë bërë bashkë dhe kërkojnë që t’u vendeve të Ballkanit Perëndimor t’u lehtësohet rruga drejt integrimit.
Por, mendim të kundërt kanë Franca, Danimarka, Suedia, Spanja dhe Holanda të cilat kërkojnë një kuadër me rregulla të forta negociuese. Madje Franca ka vendosur vija të kuqe dhe nuk ka pranuar që të tërhiqet nga qëndrimet e saj duke e bërë praktikisht të vështirë integrimin dhe zvarritur në kohë hapjen e negociatave.
Gjermania, e cila kryeson presidencën e BE-së është treguar gjithashtu jo mbështetëse për Shqipërinë dhe Maqedoninë, duke thënë se nuk do të kërkojë të bëhen ndryshime të mëdha dhe të lërë në fuqi rregulla të forta për integrimin. Negociatat mes vendeve anëtare të BE-së do të vijojnë deri më 10 nëntor.
Ndonëse për të dyja shtetet janë vendosur një sërë kushtesh të cilat duhet të plotësohen deri në konferencën e parë ndërqeveritare, Shqipëria ka plotësuar një pjesë të tyre. Ende problem në vendin tonë mbetet funksionimi i Gjykatës së Lartë dhe asaj Kushtetuese. Për ngritjen dhe funksionimin e Gjykatës Kushtetuese ndërkombëtarët kanë kërkuar që të mbyllet brenda këtij viti, por duket se një gjë e tillë nuk është e mundur.
Pra, mesa duket Bashkimi Europian ende nuk do ta japë dritën jeshile për Shqipërinë që të jetë pjesë e familjes së tyre. Qëndrimet e Holandës dhe Francës do të jenë ndoshta pengesa kryesore për hapjen e negociatave, pasi të dyja vendet janë shprehur skeptike që në fillim të procesit.
