Prokuroria e Posaçme ka nisur punën për verifikimin e kandidatëve. Janë plot 650 emra të cilët kanë kandiduar për t’u bërë pjesë e FBI-së shqiptare, nga ku vetëm 60 do të përzgjidhen për të qenë në këtë strukturë të rëndësishme.
Verifikimi i tyre do të kryhet në disa faza, ku në fazën e parë kandidatët do të skualifikohen nëse nuk plotësojnë kriteret bazë, mes të cilave edhe arsimimi.
Sipas informacioneve komisioni i përbërë nga Vladimir Mara, Dritan Prençi dhe Enkelejda Millonai ka hapur dosjet e secilit kandidat dhe fillimisht po bëhet një verifikim paraprak nëse janë dorëzuar të gjitha dokumentet dhe nëse kandidatët plotësojnë kushtet bazë.
Pra ata që rrezikojnë të skualifikohen në fazën 1 janë të gjithë emrat që kanë mungesë dokumentacioni, si dhe personat që nuk kanë arsim të lartë policor, në drejtësi apo kontabilitet, ose arsim të lartë në degë të tjera që kanë lidhje me misionin e Byrosë Kombëtare të Hetimit, nga një universitet vendas apo i huaj.
Si dhe ata që nuk kanë mbi 1 vit përvojë në fushën e policisë apo të drejtësisë penale. Bëhet fjalë për 650 dosje dhe duket se komisioni ka shumë punë përpara. Pritet që brenda pak ditësh BKH të japë detaje mbi emrat që plotësojnë kushtet dhe do të kalojnë në fazat e tjera.
Testimi
Kandidatët e kualifikuar në fazën e dytë i nënshtrohen një provimi me shkrim e me gojë, ku përfshihen teste konjitive, të sjelljes dhe të arsyetimit logjik. Do ketë një provim të zgjeruar me shkrim që mat aftësitë e shkrimit të raporteve, si dhe nivelin e shkrimit e leximit.
Më pas do ketë një intervistë nga një komision që mat aftësitë e komunikimit verbal, si dhe aftësinë për t’i komunikuar idetë me eficencë. Pra testi psikologjik. Faza e fundit është poligrafi apo makina e së vërtetës. Pra ata që pritet që të skualifikohen që në fazën e parë janë pikërisht ata që nuk plotësojnë kriteret e arsimimit dhe tashmë Komisioni i Posaçëm i Rishikimit ka nisur të hapë dosjet e 650 emrave..
Por procesi i skualifikimit po monitorohet edhe nga ndërkombëtarët e më konkretisht janë 2 anëtarë të Bashkimit Europian dhe 2 anëtarë të Shteteve të Bashkuara të Amerikës. Kandidatët që e kalojnë këtë fazë, do i nënshtrohen disa fazave të tjera. Kandidatët do i nënshtrohen edhe testimit me shkrim për të matur inteligjencën se sa të aftë janë për të shkruar raport. Më pas, ata që e kalojnë këtë fazë me sukses do të testohen për aftësitë fizike dhe në fund në makinën e së vërtetës.
Brenda muajit mbyllet procesi
Por përzgjedhja për 60 emrat që do të jenë pjesë e BKH po ecën me ritme të shpejta. Sipas informacioneve të gazetës pritet që Komisioni i Posaçëm i Rishikimit të mbyllë brenda këtij muaji procesin e përzgjedhjes së hetuesve dhe në muajin nëntor të nisen për në Shtetet e Bashkuara të Amerikës, ku do të trajnohen për 1 muaj.
Më pas FBI dhe Departamenti i Drejtësisë do të sjellin ekspertë në Tiranë që do të zhvillojnë trajnime dhe do të instalojnë pajisje speciale që do të dhurohen nga SHBA. Fakti që çdo kandidat do të kalojë në filtrin e amerikanëve tregon qartë se ky organ do të jetë imun ndaj ndikimit politik dhe kur BKH të jetë gati, politika duhet të trembet.
Muaji dhjetor do të jetë vendimtar për kupolën e drejtësisë. Në këtë muaj, BKH pritet të jetë funksionale dhe gjëja e parë që ata do të bëjnë është monitorimi i njerëzve të drejtësisë.
Përgjimi i telefonatave, email dhe kontrolli i llogarive bankare të anëtarëve të Strukturës së Posaçme Antikorrupsion pritet që të fokusi i parë i punës së Byrosë së Hetimit. Deri më tani, monitorimi i anëtarëve të SPAK nuk ka ndodhur për shkak të mungesës së BKH, por me ngritjen e saj në dhjetor çdo gjë do marrë tjetër rrjedhë.
Hetuesit specialë të FBI shqiptare do të kryejnë përgjimet, ndërsa Drejtoria e Përgjithshme e Pastrimit të Parave do të merret me kontrollin e llogarive bankare./ELISJEDA KIKO
