Ish kreu i Këshillit të Emërimeve në Drejtësi Ardian Dvorani ka nisur betejën e tij me Këshillin e Lartë Gjyqësor. Pas vendimit të Këshillit për shkarkimin nga detyra të Ardian Dvoranit si anëtar i Gjykatës së Lartë me argumentin se i ka mbaruar mandati, atij i është propozuar që të jetë pjesë e gjykatave të Apelit.
Por përpara se të vendosë a do të jetë pjesë e gjykatave të Apelit apo do të vijojë më tej betejën, Dvorani i ka kërkuar KLGJ-së përmes një shkrese një listë me vendet vakante në Gjykatat e Apelit, për të marrë vendimin nëse i përshtaten apo jo. Por sipas informacioneve, KLGJ ende nuk i është përgjigjur kësaj kërkese, por e ka futur në rendin e ditës dhe do të diskutohet gjatë mbledhjes ditën e sotme. Përmes një njoftimi në faqen zyrtare, KLGJ bëri me dije se caktimi i Dvoranit në një nga Gjykatat e Apelit do të diskutohet dhe më pas votohet nga anëtarët.
“Shqyrtimi i projektvendimit “Për hapjen e procedurës së komandimit në pozicionin e ndihmësmagjistratit në Gjykatën e Lartë dhe shpalljen e kërkesës për kandidatura nga radhët e gjyqtarëve”, i përgatitur nga Komisioni i Zhvillimit të Karrierës; Shqyrtimi i projektvendimit “Për shqyrtimin e kërkesës për rikthimin në detyrë të znj. Ariana Gaçi”, i përgatitur nga Komisioni i Zhvillimit të Karrierës; Shqyrtimi i relacionit “Mbi situatën e pritshme të caktimin në pozicion të të sapodiplomuarve për magjistratë, profili gjyqtar”, i përgatitur nga Komisioni i Zhvillimit të Karrierës; Shqyrtimi i projektvendimit “Për publikimin e pozicioneve të lira në nivel apeli, për gjyqtarin Ardian Dvorani, që ka të drejtën e caktimit në një pozicion të tillë”, i përgatitur nga Komisioni i Zhvillimit të Karrierës”, thuhet në njoftimin e KLGJ.
Por pas vendimit të Këshillit të Lartë Gjyqësor për shkarkimin si anëtar i Gjykatës së Lartë dhe automatikisht edhe nga Këshilli i Emërimeve në Drejtësi, Dvorani e cilësoi si një gafë të paimagjinueshme këtë vendim, duke lënë të hapur edhe mundësinë e apelimit. Ndërkohë që pritet të shihet se cili do të jetë vendimi i Dvoranit gjatë këtyre ditëve, nëse do pranojë të jetë pjesë e gjykatave të Apelit apo do vijojë me betejat ligjore me KLGJ.
Ja si lindi konflikti Meta-Dvorani
Presidenti Ilir Meta kërkoi largimin e Ardian Dvoranit nga detyra me argumentin se pas zgjedhjes së tre anëtarëve të rinj në Gjykatën e Lartë në mars të këtij viti, atij i kishte mbaruar detyrimi kushtetues për të qëndruar më në detyrë. Në luftën e ftohtë mes Këshillit të Emërimeve në Drejtësi drejtuar nga Dvorani dhe Presidentit, Këshilli i Lartë Gjyqësor vendosi të marrë një mendim nga EURALIUS i Bashkimit Europian dhe OPDAT e Shteteve të Bashkuara të Amerikës.
Por si EURALIUS dhe OPDAT refuzuan të japin opinion në lidhje me rastin e mandatit të Ardian Dvoranit. Kujtojmë që lufta e ftohtë me akuza dhe padi deri në SPAK mes Metës dhe Dvoranit filloi që vitin e kaluar, pasi KED është institucioni që bën përzgjedhjen e kandidatëve për në Gjykatën Kushtetuese. Pikërisht për këtë, pra renditjen dhe listat me pikëzimin, që i dërgoi Parlamentit dhe tij, Ilir Meta akuzoi Ardian Dvoranin dhe çështja shkoi deri në Komisionin e Venecias.
