Shtetet e Bashkuara të Amerikës kërkojnë që të ketë sekuestrime pasurish edhe për pushtetarët e korruptuar. Deri më tani ligji anti-mafia nuk ka funksionuar në vend, pasi të gjithë të dënuarit kanë gëzuar deri më sot pronat miliona eurosh.
Qeveria ka nxjerrë në rrugë OFL për të goditur pasuritë e krimit, por nuk prek pronat e politikanëve. Deri më tani ka disa emra që janë hetuar apo dënuar, por që nuk u është bërë asnjë verifikim pasuror. Në raportin e DASH për pastrimin e parave theksohet rëndësia e zbatimit të “Udhëzimit nr.6”, sipas të cilit duhet që të bëhet një verifikim pasuror për ata që akuzohen për korrupsion, pastrim parash apo krim të organizuar. “Shqipëria ka një treg të konsiderueshëm të zi për mallra të kontrabanduar, i lehtësuar nga kontrollet e dobëta kufitare dhe doganës.
Kontrolli joefektiv ndërkufitar i lëvizjes së monedhës mbetet një problem, megjithëse një njësi e re për të përmirësuar zbulimin, e themeluar në vitin 2018, ka rritur konfiskime parash në kufij. Gjykatat shqiptare shpesh refuzojnë të dënojnë për pastrim parash në mungesë të një dënimi për kundërvajtje edhe pse kjo nuk kërkohet posaçërisht me ligj. Udhëzimi i Përgjithshëm Nr. 6 i kërkon prokurorëve të kryejnë hetime paralele financiare dhe të konfiskojnë pasuritë kriminale kur kanë të bëjnë me korrupsionin, krimin e organizuar, trafikimin e paligjshëm, pastrimin e parave dhe vepra të tjera të listuara. Kur zbatohen si duhet, ndryshimet ligjore dhe të politikave rezultojnë në zbatim më të mirë të ligjeve të pastrimit të parave dhe krimit financiar”, thuhet në raport.
Të rrezikuarit
Por kush është udhëzimi në fjalë? Gazeta e ka siguruar të plotë dhe bëhet fjalë për një udhëzim të nxjerrë nga ish-Kryeprokurorja Arta Marku, sipas të cilit çdo prokurori në vend, nëse ka një hetim për korrupsion, krim të organizuar, pastrim parash, etj., duhet që të bëjë verifikim pasuror. Po ashtu është kërkuar që të bëhet verifikimi pasuror edhe për ata që tashmë janë gjykuar dhe i kanë shpëtuar këtij procesi. Nga kjo lëvizje rrezikohen edhe pushtetarë.
Kemi presidentin Meta dhe kreun e opozitës Lulzim Basha që janë hetuar dikur dhe kanë shkuar për gjykim, por nuk u janë verifikuar pasuritë. Ish-ministri Tahiri u dënua, por nuk ju verifikua pasuria. Po ashtu ka dhe shumë ish-ministra të PD të hetuar ndër vite që nuk u janë hetuar pasuritë. Një dosje e freskët në Apel është ajo e CEZ dhe nëse kthehet për hetim, sipas udhëzimit duhet të ketë hetim pasuror për të akuzuarit, përfshirë ish-kryeministrin Berisha.
Roli i SPAK
Udhëzimi i Markut ishte për Krimet e Rënda, ku u ngrit një njësi e posaçme që do të merrte në dorë të gjitha dosjet për verifikim pasuror. Mësohet se shumë prokurori në rrethe dhe Prokuroria e Përgjithshme dorëzuan me dhjetëra dosje. Pra, para se të shkriheshin Krimet e Rënda aty u mblodhën të gjitha dosjet që nuk i janë nënshtruar verifikimit pasuror. Sipas ligjit, çdo dosje e Krimeve të Rënda duhet të transferohet te Prokuroria e Posaçme. Kjo do të thotë se në dorë të SPAK janë të gjitha dosjet e rretheve dhe të Prokurorisë së Përgjithshme (Para reformës në drejtësi hetonte pushtetarët e lartë). Sinjalet janë se kur Byroja e Hetimit të jetë gati të nisë reprezalja. SHBA e ka bërë të qartë se deri më tani masat kundër krimit ekonomik nuk kanë dhënë efekt prandaj duhet më shumë punë.
