Deputeti i Partisë Socialiste, Erion Braçe ditën e djeshme është përplasur me ministren e Bujqësisë, Frida Krifca në Komisionin e Ekonomisë. Deputeti kritikoi politikën fiskale, të cilën e quajti të paqëndrueshme. Sipas Braçes, sektori i Bujqësisë dhe i Blegtorisë është një sektor shumë i vështirë sa i përket punës dhe ka nevojë për politika të mbështetjes.
“Kemi 8 vite qeverisje, më bën përshtypje që të gjitha politikat që lidhen drejtpërdrejt me bujqësinë janë të paqëndrueshme dhe ky është një problem shumë i madh. Një politikë fiskale e paqëndrueshme hynë një fabrikë që ka çati, krijon probleme. Jo më në një sektor ku punohet në një qiell të hapur, në kushte shumë të vështira. Te bujqësia nuk mban sepse puna është përtej çdo caku e vështirë.
Qëndrueshmëria e skemave të mbështetjes, ta di bujku që këto katër vite politika e mbështetjes së tij do të jetë përmes kësaj dhe kësaj skeme. Fjala bie në blegtori, do të jetë mbështetje për kokë bagëtish dhe për litra. Kjo trajektore e paqëndrueshme në 16 vjet nuk e ka ndihmuar fare bujkun, kur i dhamë frymëmarrje kur e bëmë 20 me 20, ia morëm frymën mbrapsht prapë”, tha deputeti. Po ashtu Braçe u ndal edhe tek kontratat e dhënies së tokës me qira, të cilat sipas tij kanë përfunduar në duart e banditëve.
Deputeti tha se duhet bërë një auditim i vlefshmërisë së këtyre kontratave në raport me detyrimet e deri tek akordimet për të ushtruar veprimtari bujqësore. Sipas Braçes, shteti duhet të marrë masat para se institucionet e tjera ligjzbatuese të marrin masat e tyre. “Janë disa kontrata të dhënies së tokës me qira që kanë përfunduar në duar të këqija, madje po vriten për ato kontrata.
Mundet që dikush të ketë investuar ca para, por bujqësi nuk po bën me to. Ka mundësi që ju të auditoni sa më parë këto kontrata dhe të prishni kontratat ku rezultojnë persona të papërshtatshëm sepse janë banditë. Mos presim që SPAK të vërë sekuestrimin e pronave të tyre. Pra të bëhet një auditim i vlefshmërisë së këtyre kontratave në raport me detyrimet që kanë pasur për të ushtruar veprimtari bujqësore deri tek akordimet me institucionet ligjzbatuese, para se institucionet e tjera ligjzbatuese të marrin masat e tyre”, tha ai.
Braçe kritika për politikat e taksimit
Nga ana tjetër deputeti u tregua kritik edhe ndaj politikës së taksimit. Duke iu drejtuar zv.kryeministrit Arben Ahmetaj, i cili më parë ishte ministër i Financave, Braçe tha se para 3 vitesh po në këtë komision e ka paralajmëruar se politikat e taksimit e dëmtojnë bujqësinë dhe blegtorinë. Sipas deputetit, qeveria nuk duhet t’u bëjë dëm këtyre sektorëve, por t’i stimulojë ata.
3 vite nga sot i kemi thënë këtu ministrit të financave mos me politikat e taksimit se po e dëmton, mos se po bën dëm, ja ku jemi tre vite më pas e provuar nga A tek ZH, sidomos në blegtori. Është momenti të mblidhemi, të ulemi që ti japim fshatit atë që takon. Në tremujorin e dytë bujqësia është i vetmi sektor që nuk pati rritje. Mendojmë ne ta ndihmojmë këtë gjë ta stimulojmë si sektorët e tjerë, po nëse nuk e stimulojmë të mos bëjmë dëm”, tha ai.
