Thellohen dyshimet mbi tentativat e ish-kryeministrit Sali Berisha për të marrë drejtimin e Partisë Demokratike. Sot do të ketë një përballje mes të dyja kampeve, ku Basha nga njëra anë do të tregojë forcën në Kuvendin Kombëtar, ndërsa Berisha do të mundohet të shpallë të vlefshëm referendumin që do të mbajë në bazë për shkarkimin e Bashës.
Por një ditë para këtyre zhvillimeve ka ardhur një lëvizje sa surprizuese, aq edhe e dyshimtë nga Gjykata e Tiranës. Sipas informacioneve, gjyqtari i caktuar për të shqyrtuar ndryshimet statutore të Kuvendit të 11 dhjetorit, Agron Zhukri ka hequr dorë nga procesi. Lajmi nuk është konfirmuar nga Gjykata e Tiranë, secila gjithashtu nuk e ka mohuar një zhvillim të tillë.
“Për sa i përket kërkesës së gjyqtarit Agron Zhukri për heqje dore nga shqyrtimi i kërkesës së bërë nga Partia Demokratike e Shqipërisë, ju komunikoj se Gjykata e Tiranës, nuk ka informacion lidhur me këtë kërkesë”, thuhet në njoftimin për mediat.
Sipas informacioneve në këtë gjykatë, kërkesa e gjyqtarit ka ardhur dje, ndërsa nuk dihen qartë argumentet por zakonisht largimi nga trupa gjykuese vjen për shkak të konfliktit të interesave. Tani e ka në dorë kreu i gjykatës të vendosë nëse do pranohet kërkesa dhe nëse po, do të duhet të hidhet short i ri. Por kjo lëvizje ka ngjallur shumë dyshime. Pse erdhi largimi i gjyqtarit?
A po bëhen presione në prapaskenë që të aprovohet statuti i 11 dhjetorit? A po tentohet që të vihet një gjyqtar besnik që të vulosë Kuvendin e 11 dhjetorit? Apo janë gjyqtarët që i tremben Berishës dhe nuk duan të përzihen me konfliktin në PD?
Nuk dihet fiks se çfarë ka ndodhur, por e sigurt është që Berisha po lufton me të gjitha mënyrat për të marrë kreun e PD dhe të enjten ai dha sinjale se do të bëjë gjithçka që gjykata të aprovojë ndryshimet statutore të miratuar prej tij. Një nga besnikët e tij, Çlirim Gjata e cilësoi si “puç” nëse nuk aprovohet statuti.
“Gjykata duhet të regjistrojë statutin tonë të ri, i korrikut ka rënë. Gjykata thjeshtë bën depozitimin. Nëse Gjykata nuk bën regjistrimin e statutit të datës 11, domethënë që ka një ndërhyrje tepër të fuqishme politike. Sepse nuk ka asnjë arsye dhe as shkak ligjor që Gjykata të mos e regjistrojë”, tha ai.
Marrja e PD me dhunë
Berisha ditët fundit po kërcënon se do të marrë me dhunë selinë. Edhe pse tentoi të hënën dhe u tërhoq, sinjalet janë se nëse referendumi vendos shkarkimin e Bashës ai do të tentojë që të mos lejojë kreun demokrat të futet në seli. Por sipas burimeve, synimi i tij është certifikimi i statutit. Statuti aktual nuk e lejon mbajtjen e referendumit dhe Berisha bëri disa ndryshime më 11 dhjetor ku i hapi rrugë procesit.
Por nëse gjykata ja rrëzon ndryshimet, atëherë asgjë nuk ka vlerë. Një burim afër tij u shpreh se pikërisht po luftohet fort në gjykatë që të aprovohet statuti dhe kjo do jetë arma kryesore që do përdorë Berisha, pasi do justifikohet se e ka njohur gjykata.
Edhe dorëheqja e gjyqtarit në fjalë mund të ketë ardhur për shkak të këtij skenari. Duhet theksuar se ndikimi i Berishë në gjyqësor është shumë i madh dhe duket se e gjithë beteja po bëhet pikërisht për të vulosur ligjshmërinë e statutit të ri.
