Ambasadorja amerikane Yuri Kim, ka dërguar dje një mesazh të fortë në drejtim të kryeministrit Edi Rama, kreut të opozitës Lulzim Basha dhe Komisionit Qendror të Zgjedhjeve.
Shefja e diplomacisë amerikane në Tiranë ka pasur një takim kokë më kokë me kreun e KQZ, Ilirian Celibashi, ku fokus kryesor ka qenë procesi i dekriminalizimit. Përveçse është informuar mbi ecurinë e zgjedhjeve, mësohet se ambasadorja ka kërkuar nga KQZ që të mos lejojë asnjë kandidat të inkriminuar.
Detaje për takimin dha dhe ambasada në rrjetet sociale, duke u dërguar një mesazh edhe partive politike. Kim ia ka bërë të qartë Celibashit se edhe nëse partitë i kandidojnë personat problematikë, është detyrë e KQZ t’i skualifikojë.
Madje ajo ka përmendur dhe listën e zezë të DASH me emrat e shpallur “non grata”, ku ka kërkuar që këta persona të mos jenë në listat e deputetëve. Mesazhi ka shkuar jo vetëm për KQZ, por edhe për politikën, pasi kemi 2 politikanë që janë në listën e zezë të amerikanëve. “Teksa edhe 100 ditë na ndajnë nga zgjedhjet parlamentare shqiptare më 25 prill, Ambasadorja Kim u takua me Kryetarin e KQZ-së Celibashi dhe zëvendëskryetaren Pelinku për të shprehur mbështetjen për rolin e tyre kritik në sigurimin e zgjedhjeve të lira dhe të ndershme.
Ajo nënvizoi nevojën për të zbatuar në kohë dhe mënyrë efikase identifikimin biometrik dhe masa të tjera të nevojshme. Duke kujtuar letrën e saj të 31 gushtit drejtuar Kryetarëve të Partive, ajo kujtoi KQZ-në për përgjegjësinë e saj për t’u siguruar që kandidatët të jenë në përputhje me ligjin shqiptar. Ajo nënvizoi mbështetjen e Shteteve të Bashkuara të Amerikës për përmbushjen e kërkesave të popullit shqiptar për politikë më të pastër, duke filluar nga politikanë më të pastër. Në këtë drejtim, ajo përmendi se Sekretari Amerikan i Shtetit ka përcaktuar publikisht individë të caktuar për korrupsion madhor. Këto përcaktime mbeten në fuqi”, thuhet në njoftim.
Ambasadorja e prerë në qëndrim
Ndërkohë ambasada e SHBA thekson në statusin e saj, se ambasadorja amerikane i ka kërkuar kreut të KQZ të marrin të gjitha masat për të parandaluar blerjen e votave dhe manipulimin e votave. “Ata ranë dakord që KQZ-ja duhet të marrë të gjitha masat e mundshme, jo vetëm për të mundësuar ndjekjen penale të shkeljeve, por së pari për t’i parandaluar shkeljet, përfshirë duke zbatuar masa për të parandaluar blerjen e votave dhe manipulimin e votave. Shtetet e Bashkuara mbeten një mbështetës i palëkundur i Shqipërisë dhe popullit shqiptar ndërsa ata punojnë për një demokraci më të mirë, udhëheqës më të mirë dhe një të ardhme më të mirë”, thotë ambasada e SHBA.
Më herët ambasadorja e Shteteve të Bashkuara të Amerikës në Shqipëri, Yuri Kim mori pjesë në veprimtarinë për nisjen e Akademisë së Transparencës SHBA-Shqipëri të USAID-it. Gjatë fjalës së saj, zonja Kim theksoi se kjo akademi, sipas saj, do të nxisë dialogun publik mbi llogaridhënien. “Akademia e Transparencës e USAID-it (USATA) do të nxisë dialogun publik mbi llogaridhënien dhe do të rrisë përkrahjen drejt rritjes së transparencës. Padyshim, ndryshimi i zakoneve dhe ndërtimi i besimit të publikut do të kërkojë kohë, por kjo aleancë midis Shteteve të Bashkuara të Amerikës dhe Shqipërisë do të sigurojë që burimet dhe njohuritë teknike të jenë në dispozicion për një periudhë afatgjatë”, nënvizoi ambasadorja Kim.
