Ambasadorja amerikane Yuri Kim duket se nuk do të lejojë rrëzimin e reformës në drejtësi. Teksa SPAK ka hyrë në një fazë të rëndësishme dhe Byroja e Hetimit është punë ditësh, të shumtë janë ata që po tentojnë sabotimin e reformës. Vetë ambasadorja e ka deklaruar disa herë se armiqtë janë sy e veshë për të goditur pas shpine. Pika më delikate e reformës është padyshim Gjykata Kushtetuese, ku të gjithë duan të kenë dorën e tyre.
Në aspektin politik, kjo gjykatë ka rëndësi madhore pasi çdo akt, çdo vendim, çdo marrëveshje e çdo gjë tjetër nxjerrë nga qeveria, Parlamenti, Presidenti, mund të marrë goditje nga kjo gjykatë dhe prandaj ka nisur një luftë e fortë për dominimin e saj. Ai që po punon hapur është padyshim presidenti, i cili arriti të shkarkonte Ardian Dvoranin dhe në krye të KED të vendosë të besuarën e tij. Mirëpo gazeta ka mësuar se ambasadorja amerikane nuk do të ndalet vetëm me editorialin e së enjtes ku paralajmëroi presidentin dhe mazhorancën që të qëndrojnë larg çdo pazari.
Sipas burimeve pranë ambasadës së SHBA, duke filluar nga java që vjen, Yuri Kim do të zhvillojë një sërë takimesh të rëndësishme vetëm për çështjen e Kushtetueses dhe raportin e Komisionit të Venecias. Sipas informacioneve, do të ketë takime e biseda me përfaqësues të Presidencës, të Kuvendit, KLGJ dhe të Këshillit të Emërimeve në Drejtësi. Nuk përjashtohen mundësitë që takimet të jenë drejtpërdrejt me Metën dhe Ruçin.
Të enjten mbrëma ambasadorja thirri në rezidencën e saj ministren e Drejtësisë, Etilda Gjonaj, ku është diskutuar pikërisht mbi raportin e Komisionit të Venecias dhe ngërçin në Kushtetuese. Pra duket se po shkojmë drejt skenarëve të reformës zgjedhore. Kim mblodhi për dy ditë rresht PD, PS dhe LSI dhe i detyroi të firmosin draftin që do mundësojë plotësimin e kushtit për hapjen e negociatave.
Edhe Kushtetuesja është po ashtu kusht dhe ambasadorja duket se do të përdorë të njëjtën metodë për të ndalur çdo uzurpim. Mazhoranca dhe Kuvendi po tentojnë ta përdorin raportin e Venecias sipas interesave, por Kim duket se do të marrë drejtimin e lojës duke mos lejuar asnjë spekulim, pazar apo ngërç të ri.
Ikja e Dvoranit dhe roli i dyshimtë i Metës
Në editorialin e së enjtes, ambasadorja amerikane duket se ka lëshuar një mesazh të koduar për largimin e Dvoranit. Meta ishte ai i cili doli me vrap duke deklarua se kreun e KED duhet ta marrë nënkryetari, pra Vitore Tusha. Por ambasadorja në qëndrimin e saj shprehet: “Është me rëndësi që as Presidenca dhe as Parlamenti nuk është një gjykatë me autoritetin për të vendosur se si duhet ecur përpara kur në legjislacion ka një boshllëk. Komisioni i Venecias vë në dukje se “Varet nga Gjykata Kushtetuese që të vendosë për interpretimin e dispozitave të Kushtetutës në një situatë që nuk parashikohet në procesin e hartimit””.
Kjo këshillë thekson urgjencën e ngritjes së një Gjykate Kushtetuese funksionale sa më shpejt që të jetë e mundur. Pra sipas saj, për çdo gjë duhet të vendosë Kushtetuesja dhe askush tjetër. Por nga ana tjetër dje presidenti Ilir Meta tregoi dhe një herë se nuk ka ndërmend të tërhiqet. Meta tha se ka përkthyer raportin e Venecias dhe do ja u dërgojë të gjitha institucioneve. Ndërsa elementi tjetër dyshues është se presidenti do u dërgojë udhëzim të gjitha institucioneve duke u treguar detyrat që duhet të përmbushin për Kushtetuesen. Kjo shkel çdo lloj pavarësie gjyqësori. KLITI TOPALLI
